هەڵەبجە

 

ئێوارەی دوێنێ ١ی تەمموز، لەژێر چاودێری وەزیری کشتوکاڵ و سەرچاوەکانی ئاو  و کێڵگەی کشتوکاڵی کوردستان و بە ئامادەبوونی قایمقامی قەزای ناوەندی هەڵەبجە، ژمارەیەک خاوەن دوکان و هاوڵاتیان هەفتە بازاڕی کشتوکاڵی کرایەوە لە شاری هەڵەبجە کرایەوە.

لەسەرەتای مەراسیمەکەدا حسێن عبدالکریم وتەبێژی وزارەتی کشتوکاڵ و سەرچاوەکانی ئاو خۆشحاڵی خۆی بۆ کردنەوەی هەفتە بازاڕی کشتوکاڵی دەربڕی و ئاماژەی بەوەدا کە ئەم جۆرە کارانە  لەڕووی ئابوریەوە سودێکی زۆر بە هاوڵاتیان و خاوەن کێڵگەکان دەگەیەنێت، چونکە بەرهەمەکان بە تازەیی و هەرزانی دەستدەکەوێت.

 

ئەو بەرهەمانەی لە هەفتە بازاڕدا نمایش دەکرێن بەرهەمی سەوزە، میوەن و ئەو بەرهەمانەی کە جوتیاران داهێنانیان تێدا کردووە وەک شوتى زەرد و باینجانی سپی و چندان بەروبوومى دیکە.

پرۆژەی هەفتە بازاڕی کشتوکاڵی ژمارەیەکی زۆر لە هاوڵاتیان تێیدا بەشدارن و ژنانیش ڕەنج و بەرهەمەکانیان پێشکەش بە سەردانیکاران دەکەن، ئەدیبە فازیل ژنێکی دەستڕەنگینی بەشداربووی فێستیڤاڵەکەیە، بەدەم دروستکردنی کەلانەوە وتی: ئێمە پێشتر ئامادەکاریمان کردووە و سەرجەم بابەتەکانمان گەنم و ئارد و کەلوپەلەکانمان خۆماڵییە.

خانمان و ژنان دەستێکی باڵایان هەیە لە پێگەیاندن و ساغکردنەوەى بەرهەمەکاندا

نوخشە ناصیح، قائیمقامى ناوەندی پارێزگای هەڵەبجە، تایبەت بە ژنها دوا و وتى: لای هەموان ئاشکرایە زەوییەکانى دەورووبەری هەڵەبجە و شارەزوور بەپیتن بۆ کشتوکاڵ و باخداری، پشتگیریی خۆمان بۆ خاوەن باخ و سەرجەم جوتیاران دووپات دەکەینەوە.

 

هەروەها وتیشی: خۆشحاڵم ژنان دەستێکی باڵایان هەیە لە پێگەیاندن و ساغکردنەوەى بەرهەمەکانیان و دەست خۆشیان لی دەکەین و بەهیوای بەردەوامی لە کارەکەیاندا.

ئەو بەرهەمانەی لەلایەن ژنانەوە دروستدەکرێن بەرهەمێکی بەپێز و جوانن

کوێستان ئەکرەم فەرەج، سەرۆکی شارەوانى هەڵەبجە، خۆشحاڵی خۆی دەربڕی لە کردنەوەى هەفتە بازاڕ و بەشداریکردنى ژنانی بە گرنگزانى و وتى: ئەو کارانەى کە بەشداریکردنی ژنانی تێدابێت بە دڵنیایەوە شێوازێکی جوان و سەرکەوتووە.

 

باسیشی لەوە کرد بەرهەمە خۆماڵییەکان بەرامبەر ئەو بەرهەمانەی کە هاوردە دەکرێت پاک و خاوێنتر و بەسودترە،  سودی بۆ کڕیار و فرۆشیاریش هەیە.

وابڕیارە هەفتە بازاڕی کشتوکاڵی هەموو کۆتاییەکی هەفتە لە ڕۆژانی پێنج شەممە و هەینی لە کاتژمێر سێی پاشنیوەڕۆ بۆ نۆی شەو بەردەوام بێت، تێیدا سەرجەم پێداویستییە کوردی و خۆماڵیەکان لە بەباتی سەوزە و میوە دەستدەکەوێت.

ت.پ