ناوەندی هەواڵ

 

پێکدادانی کوشندەی نێوان بزووتنەوەکانی گەل و هێزە ئاسایشییەکانی ڕۆژهەڵاتی کوردستان و ئێران کوژراوی لێکەوتووەتەوە، لە کاتێکدا خۆپیشاندانەکان بۆ زانکۆکان، بازاڕەکان و گەڕەکەکانی نیشتەجێبوون بڵاوبوونەتەوە، کە ئەمەش ئاماژەیە بۆ فراوانبوونی بازنەی توڕەیی گشتی بەرامبەر بە سیاسەتەکانی حکومەت.

 

بەپێی هەواڵی میدیا ناوخۆییەکان، ناڕەزایەتییەکان لە شارە جیاوازەکانی ڕۆژهەڵاتی کوردستان و  ئێران بۆ شەشەمین ڕۆژی لەسەریەک بەردەوامن، ئەوەش دوای پێکدادانێکی خوێناویی نێوان خۆپیشاندەران و هێزە ئاسایشییەکان کە بەهۆیەوە ٩ کەس کوژراون.

 

ناڕەزایەتییەکان بە مانگرتن و خۆپیشاندانی خاوەن دوکانەکان لە تاران دەستیپێکرد، زانکۆکان و چەندین شاری گەورە و بچووکی گرتەوە، بە بەشداریی خوێندکاران، بازرگانان، ژنان و گرووپە کۆمەڵایەتییە جیاوازەکان، کە ئەمەش ڕەنگدانەوەی پەرەسەندنی ناڕازیبوونە لە سیاسەتە ئابووری و کۆمەڵایەتییەکان.

 

چەندین زانکۆ لە تاران و شارەکانی دیکە شایەتحاڵی خۆپیشاندانی خوێندکاران بوون، لەو ماوەیەشدا دروشمی ''خوازیاری ئازادکردنی دەستبەسەرکراوان و ڕەتکردنەوەی سیاسەتەکانی حکومەت'' وترایەوە، کە بەشێک لە بەشەناوخۆییەکانی زانکۆکان بوونە شوێنی کۆبوونەوە، پێش ئەوەی لەلایەن هێزە ئاسایشییەکانەوە گەمارۆ بدرێن و دەروازەکانیان دابخرێت.

 

لە شارەکانی وەک قەزوین، کەرەج، قوم، خۆپیشاندەران شەوانە ڕژانە سەر شەقامەکان و دروشمیان دژی دەسەڵات وتەوە، لە گرتە ڤیدیۆییەکاندا دەرکەوتووە کە خۆپیشاندەران ئاگریان لە شەقامەکان و کۆنتێنەرە کانزاییەکاندا بەردا، وەک جۆرێک لە ناڕەزایەتی لێدەدەن.

 

"بەشدارییەکی بەرچاوی ژنان"

ژنان لە ناڕەزایەتییەکاندا ڕۆڵێکی بەرچاویان هەبوو، کۆمەڵێک لەوان لە شەقامەکانی شاری کەرەج دەرکەوتن و بە هەڵپەڕکێ و گۆرانی ناڕەزایەتییان پێشکەش کرد و دروشمیان دەوتەوە، هەروەها لە نێو ڕەخنەی بەرفراوان لە سنووردارکردنی ژنان لە وڵاتدا بەشداریان کرد.

 

ناڕەزایەتیەکان بە هەڵمەتێکی بەرفراوانی دەستگیرکردن و پێکدادان لە نێوان هێزە ئاسایشییەکان و خۆپیشاندەران دەستیپێکرد، کە لە ئەنجامی ڕووبەڕووبونەوەی نێوانیان کوژراو و برینداری لێکەوتەوە، هەروەها دەسەڵاتداران بە بیانووی کەشوهەوای سارد و پاراستنی وزە داخستنی دامەزراوە گشتییەکانیان سەپاند، ئەمەش هەنگاوێکە چاودێران بە هەوڵێکیان زانی بۆ سنووردارکردنی کۆبوونەوەکان.

 

"پشتگیری لە ناڕەزایەتییەکان"

دامودەزگا و کەسایەتییە دیارەکانی ڕۆژهەڵاتی کوردستان و ئێران پشتیوانی خۆیان بۆ خۆپیشاندەران دەربڕی، لەوانەش دەزگای نێرگس کە لەلایەن نێرگس محەمەدی خاوەن خەڵاتی نۆبڵ بۆ ئاشتی دامەزراوە، وتی: وەستان لەگەڵ خەڵک ئەرکێکی مرۆڤدۆستانە و ڕەوشتییە.

 

هەروەها هونەرمەندی ناسراوی ئێرانی گوڵشیفتە فەرهانی، پەیامێکی بڵاوکردەوە و تێیدا هیوای خۆی بۆ "ئێرانێکی ئازاد و سەربەخۆ" دەربڕیوە، ئاماژەی بە ئازارەکانی هاوڵاتییان کردووە بەهۆی گەندەڵی و قەیرانە ئابوورییەکانەوە.

 

"دروشمی دەربڕینی خواستە سیاسییەکان"

ئەم ناڕەزایەتیانە لە کاتێکدایە کە هەڵچوونی بەرزی مانگی کانوونی یەکەمی ڕابردوودا گەیشتە ٥٢٪ ، بەپێی ئامارەکانی ناوەندی ئاماری ئێران، تەنانەت نرخی کاڵا سەرەتاییەکانیش گرانتر بووە، ئابووری ئێرانیش جگە لە قەیرانی ئاو و پیسبوون و سنووردارکردنی کۆمەڵایەتی، بەدەست گەمارۆ نێودەوڵەتییەکان و ساڵانێک لە خراپ بەڕێوەبردن دەناڵێنێت.