میهرەبان سەلام کاکەیی

هەڵەبجە- لە یەکێک لە کۆڵانەکانی شاری هەڵەبجەدا دوکانێکی بچوک و تەنگەبەر و ژنێکی لێو بەخەندە و دڵ فراوان دانیشتووە، بەڕوویەکی خۆش و زمانێکی کوردی ناتەواوەوە بەخێرهاتن دەکات، ئەو ژنەش جەمیلە عبد کلمەندییە، کە بە ڕەچەڵەک کۆسۆڤۆییە و لە شاری هەڵەبجە دادەنیشێت.

 

لە کۆسۆڤۆ لە دایکبووە و لە هەڵەبجە گیرساوەتەوە

جەمیلە عبد کلمەندی، خاوەنی کەمالیاتی بەریتانی، لە لێدوانێکی تایبەتیدا بۆ ئاژانسی ژنها وتی: "من خەڵکی ئەوروپام، لە ساڵی ۲۰۰۲ لەگەڵ کوردێک هاوسەرگیریم کردووە، ماوەی شەش مانگە هاتوومەتە هەڵەبجە و حەزم کرد لێرە ئیش بکەم، زۆر خۆشحاڵم کە توانیم کار بکەم.

 

جەمیلە باس لە خەڵکی کوردستان دەکات و دەڵێت ماوەی شەش مانگە لێرەیە و خەڵکی باش مامەڵەی لەگەڵدا دەکەن: "هەرچەندە ماوەی بیست ساڵە هاوسەرگیریم کردووە، بەڵام ئێستا هاوژینەکەم لە بەریتانیایە و خۆم لە هەڵەبجەم".

 

سەبارەت بەو پێداویستییانەی لە دوکانەکەیدا هەیە، ئەم ژنە ڕەنجکێشە وتى: هەموو شتەکان ئەسڵینوو پێداویستی منداڵان و گەنجان و ژنان و پیاوان دەفرۆشم.

 

جەمیلە خۆی بەبێگانە نازانێت و دەڵێت من لە کوردستانم و کەسوکاری هاوژینەکەم هاتوچۆم دەکەن، هەروەها زمانی کوردی بەتەواوی فێر نەبووە و ڕۆژانە بەو ڕادەیەی کە دەیزانێت مامەڵە لەگەڵ کڕیارەکانیدا دەکات.

 

ت.پ