Şengal – Di çarçoveya kar û xebatên 11’emîn salvegera fermanê de heyetek Komîteya Dîplomasî ya Tevgera Azadiya Jinên Êzidî (TAJÊ) li Baxdayê bi sazî û rêxistinên jinan re hevdîtinan pêk tîne.

Li ser vê esasî heyeta TAJÊ bi jinên şebek, Rabîta Jinên Iraqê, Cebha Kurdên Feylî û beşa jin û Sekrekterê Komîteya Navendî ya Partiya Şîî re hevdîtinan pêk anî.

Di hevdîtinan de li ser mijarên salvegera fermanê, piştî fermanê rêxistina jin û civaka Êzidî, girîngiya xweparastinê û YJŞ-YBŞ, pergala rêveberiya xweser, di roja me de rewşa Şengalê û rewşa koçberan agahî hatin parvekirin.

Di hevdîtinan de bi taybet rojeva herî girîng jî mijara rewşa jinên esîr ku ev 11 sal in di destê DAIŞ’ê de ne û aqûbeta wan nayê zanîn bû.

Di van hevdîtinan de heyetê ji sazî û rêxistinên jinan ên Iraqê xwest ku derbarê mijara esîr û ji hêla Iraqê ve naskirina jenosaîdê de piştgiriya doza jin û civaka Êzidî bikin.

Hemû sazî û rêxistinên jinan ku heyetê bi wan re hevdîtin kir, diyar kirin ku jinên Êzidî pêşeng in, hêz ji wan digirin û gotin ku ji bo piştgiriyê amade ne.