Navenda Nûçeyan- Şandeya Îmraliyê ya Partiya Wekhevî û Demokrasiyê ya Gelan (DEM Partî) ku ji parlamentera Wanê Pervîn Buldan, parlamenterê Rihayê Mîthat Sancar û endamê Buroya Hiqûqê ya Sedsalê Faîk Ozgur Erol pêk tê, di çarçoveya serdanên pêvajoya ‘Aştî û Civaka Demokratîk’ de serdanên xwe didomînin. Endamên Heyetê di çarçoveya van hevdîtinan de li avahiya Wezareta Dadê bi Wezîrê Dadê Yilmaz Tunç re rûniştin û hevdîtin pêk anîn.

Hevdîtin ji çapemeniyê re girtî pêk hat. Hevdîtin seatek û nîv berdewam kir. Piştî hevdîtinê Wezîrê Dadê Yilmaz Tunç, heyetê heya ber derî verê kir û tevlî daxuyaniyê nebû. Piştî hevdîtinê endamên şandeyê li ber deriyê Wezareta Dadê daxuyanî dan çapemeniyê.

‘Armanca me ew e ku em aştiyê bi hiqûqê mayînde bikin’

Mîthat Sancar ewilî axivî û anî ziman ku wan hevdîtineke berfireh kirine. Mîthat Sancar wiha got: “Me hem li ser xebatên wan agahî girtin û hem jî pêşniyarên xwe gotin. Em li ser pirsgirêka hiqûq û edaletê ku di rojevê de ye rawestiyan. Li ser pêvajoyê jî li ser serarestkirina hiqûqê me nêrînên xwe parve kir. Aştî tenê bi hiqûq û edaletê dikare bê mayîndekirin. Ji bo vê jî peywîreke mezin dikeve ser milê Wezîrê Dadê. Wî jî ev tişt got. Di ferqê de ye. Li ser gelek xalan xebat tên kirin. Paketa 11’emîn jî di nav de me ji bo ku zemîna hiqûqê bê xurtkirin gelek mijar nîqaş kirin. Her wiha ji bo pêvajoyê çêkirin ango guherîna qanûnan jî mijara me bû. Em ji birêz Wezîrê Dadê hîn bûn ku xebatên wan jî hene û pêşniyarên xwe jî kir. Armanca me ew e ku em aştiyê bi hiqûqê mayînde bikin. Di vê çarçoveyê de hevdîtin dê bidomin. Serkeftina vê pêvajoyê bi xebateke bi hev re pêkan e.”

‘Me fikir û pêşniyarên xwe kirin’

Pervîn Buldan jî diyar kir ku li girtîgehan binpêkirinên mafên girtiyan anîne ziman û wiha got: “Rewşa girtiyên nexweş û şewitandina înfaza girtiyan jî mijara me bû. Gelek girtiyên nexweş hene û ji ber biryarên Lîjneya Çavderiyê û Îdareyê ya Girtîgehan nayên berdan. Li ser vê yekê me fikir û pêşniyarên xwe kirin. Em ê jî bişopînin. Ji bo serkêftina pêvajoyê ev yek girîng e.”