ناوەندی هەواڵ

 

دوێنێ لە شاری هەولێر لێژنەی باڵای ڕووبەڕووبونەوەی کۆرۆنا کۆبوونەوەیان ئەنجامدا بە مەبەستی بڕیاردان لەسەر کردنەوەی دەرگای خوێندنگاکان، وتەبێژی حکومەتی هەرێمی کوردستان و وەزیری پەورەردەی هەرێم لە کۆنگرەیەکی ڕۆژنامەنووسیدا ڕایانگەیاند ٧ ی ئەم مانگە دەرگای خوێندنگاکانی هەرێمی کوردستان دەکرێتەوە، ئەمە لە کاتێکدا کێشەی پێدانی موچەی مامۆستایان و فەرمانبەران چارەسەر نەکراوە.

ئالان حەمە سەعید وەزیری پەروەردە ڕوونکردنەوەی زیاتری دەربارەی کردنەوەی خوێندنگاکان خستەڕوو، بە شێوەیەک قۆناغەکانی ١ی بنەڕەتی تا ١١ی ئامادەی بە شێوەی نۆرە دەوام دەکەن، واتە هەفتەی ٣ ڕۆژ، بۆ ڕێکخستنی دەوامیش بە شێوەی نۆرە دەسەڵات دەدرێتە دەست بەڕێوبەرایەتی گشتی پەروەردەی پارێزگاکان.

ئەو قوتابخانانەی دەکەونە گوندەکان و ناوچە دوورەکان بە مەرجێک خوێندکاریان کەم بێت لە هەفتەیکدا ٤ ڕۆژ دەوام دەکەن یەک لە دوای یەک، کاتی دەوام کردنی  مامۆستایانیش بۆ ئەم ساڵی خوێندن، پەیوەست دەبێت بە کاتەکانی وانە وتنەوە و لە دوای تەواو بوونی وانەکانیان لە خوێندنگەدا نامێننەوە.

هەروەها چوونە ناو هۆڵی خوێندنگاکان لە لایەن خوێندکارانەوە ئارەزوومەندانەیە و بەخێوکەری خوێندکار دەتوانێت پێداویستی تەواوی ئۆنلاینی بۆ دابین بکات و خوێندکار نەچێتەوە بۆ خوێندنگە، یەکی دیکەش لە بڕیارەکان ئەوەیە بۆ ئەمساڵی خوێندن جلوبەرگی یەکپۆشی جێبەجێ ناکرێت.

 

"مامۆستایان داوای ئازادکردنی زیندانیان دەکەن"

لەگەڵ ڕاگەیاندنی بڕیاری کردنەوەی خوێندنگاکان مامۆستایانی ناڕازی دوای کۆبوونەوە و گەشتنە بڕیاری هەموو شار و شارۆچکەکان لە کۆنگرەیەکی ڕۆژنامەوانیدا هەڵوێستی خۆیان پیشاندا و داواکاری خۆیان خستە ڕوو.

مامۆستایانی نارازی لە کۆنگرە رۆژنامەوانییەکەدا داوای مافە ڕەواکانی خۆیانیان کرد، داواکاری مامۆستایان بریتی بوو لە پێدانی موچە ٣٠ رۆژ جارێک بێ لێبڕین، ئازادکردنی زیندانیانی بادینان و هەولێر، سیستەمی پلە بەرزکردنەوی مامۆستایان  دەستپێبکاتەوە و ئەو موچانەی بە ناوی پاشەکەوتەوە لای حکومەت ماوەتەوە بدرێتەوە بە مامۆستایان.

مامۆستایانی ناڕازی ئاماژەشیان بەوەدا بایکۆتکردنی چوونە هۆڵی خوێندن بە مافی خۆیان دەزانن و لە ئەگەری جێبەجێ نەکردنی داواکاریەکانیان ناگەڕێنەوە بۆ هۆڵەکانی خوێندن.

 

ت.پ