شنیار بایز

سلێمانی- ٣ی ئاب شاندێکی ڕێکخراوی ژنانی ئازادی کوردستان، بە مەبەستی بەشداریکردن لە مەراسیمی یادکردنەوەی حەوتەمین ساڵیادی جینۆسایدکردنی گەلی شەنگال سەردانی شەنگالیان کرد، ئامانجی سەردانییەکەی ڕێکخراوەکە پاڵپشتیکردنی گەل بە گشتی و ژنانی شەنگال بە تایبەتی بوو، بەڵام دوای گەڕانەوەیان لە بازگەی کەڵەک لە شاری هەولێر لەلایەن ئاسایشی پارتی دیموکراتی کوردستان-پەدەکەوە دەستگیرکراون، ماوەی پێنج ڕۆژە زانیارییەک لەسەریان نییە.

 

بانوو هەڵەبجەیی، ئەندامی بەڕێوەبەری ڕێکخراوی ژنانی ئازادی کوردستان-ڕژاک، دەربارەی سێ ئەندامەکەی ڕژاک کە لەلایەن پەدەکەوە دەستگیر کراون ڕوونکردنەوەی دا و وتی: "ئێمە وەک ڕێکخراوی ژنانی ئازادی کوردستان ڕێگە پێدراوین لەلایەن حکومەتی عێراقی و هەرێمی کوردستانەوە، دەتوانین سەردانی هەر شوێنێک بکەین کە دەمانەوێت".

 

ئاماژەی بەوەشدا، لە ٣ی ئابدا و یادی حەوت ساڵەی جینۆسایدکردنی گەلی شەنگال، وەک ئەرکێکی نەتەوەیی، ئەخلاقی و مرۆڤایەتی هەستان بە ناردنی شاندێک بە مەبەستی بەشداریکردن لە مەراسیمی یادکردنەوەی جینۆسایدکردنی شەنگال، مەبەست لەم سەردانیکردنەش پاڵپشتی کردن بوو لە گەلی شەنگال و خۆبەڕیوەبەری شەنگال و ئەو ژنانەی ڕزگاربووی دەستی داعشن.

 

بانوو وتیشی: دوای ڕۆژێک لە سەردانیکردنەکە و لە کاتی گەڕانەوەی شاندەکە لە بازگەی کەڵەکی شاری هەولێر، هەر سێ ئەندامی ڕێکخراوەکە "خەولە محەمەد حەسەن، جوانا عەبدولباقی و سەیران ئەحمەد حەسە" دەستگیرکراون، تا ئێستا هیچ هەواڵێکیان نییە.

هەر بۆیە بانوو هەڵەبجەیی داوا لە گشت ڕێکخراوەکانی مافی مرۆڤ و ڕێکخراوەکانی تایبەت بە ژنان دەکات کە بەرگری لەو سێ ئەندامە ژنە بکەن و داوای ئازادکردنیان بکەن و ببنە پاڵپشتێک بۆ ڕێکخراوەکەیان.

 

ئەوەشی ئاشکرا کرد لەگەڵ ئەوەی پارێزەریان بۆ سێ ئەندامەکەیان دابین کردووە، بەڵام ڕۆژ بە ڕۆژ کارەکان دوادەخرێن و زانیارییان لەبارەوە نادرێت، لە بەرامبەریشدا دەسەڵاتدارانی حکومەت تا ئێستا هیچ هەڵوێستێکیان نەبووە بەرامبەر دەستگیرکردنی سێ ژنی چالاکوان.

 

ت.پ