Navenda Nûçeyan – Tevgera Jinên Azad (TJA) bi boneya salvegera 27'an a komploya navneteweyî ya li dijî Rêberê Gelê Kurd Abdullah Ocalan, ku di 9'ê Cotmeha 1998'an de ji aliyê hêzên navneteweyî û herêmî ve hatibû organîzekirin, daxuyaniyek nivîskî weşand. Di daxuyaniyê de hat destnîşankirin ku komplo êrîşeke navneteweyî li dijî têkoşîna gelan a ji bo azadî û rizgariya jinan hatiye kirin û wiha hate gotin: “Komplo bi berxwedanê hat pûçkirin; niha dem dema avakirina civakeke demokratîk e.”

 ‘Manîfestoya civaka azad komplo pûç kir’

 TJA'yê tekez kir ku yek ji armancên komploya 9'ê Cotmehê ew bû ku hêvî û têkoşîna azadiyê ya gelekî ku Abdullah Ocalan temsîl dikir, ji holê rake, berxwedana bi pêşengiya jinan rê li ber gihîştina armanca komployê girt û wiha domand: “Lê belê, berxwedana şehîdan, bi taybetî jinan, ku bi dirûşmeya ‘Hûn nikarin roja me tarî bikin’ bedenên xwe veguherandin agir, li seranserê cîhanê deng veda û rê li ber gihîştina armanca komployê girt. Têkbirina wê ya tevahî bi paradîgmaya civaka demokratîk, ekolojîk û azadiya jinan a ku ji hêla Rêber Apo ve di şert û mercên girtîgeha Îmraliyê de hatî pêşxistin, pêk hat. Ev paradîgma bû bingeha herî bingehîn a têkoşîna li dijî hêzên komploger. Tevî ku 27 salan li Girava Îmraliyê di tecrîdek bêhempa de jiyan kir jî, manîfestoya civaka azad a ku bi bawerî, hêvî û berxwedanek mezin bipêş ket, komplo pûç kir û hêviyên gel ji bo azadiyê ji nû ve geş kir.”

'Bi hev re jiyaneke azad bi rê ve bibin û bijîn'

Di dewamiya daxuyaniyê de wiha hat gotin: “Em dizanin ku yek ji armancên vê komployê bi taybetî azadî û têkoşîna jinan bû. Armanca wan ew bû ku pêşî li têkoşîna azadiya jinên Kurd bigirin. Lê belê, berfirehbûna bêtir a têkoşîna azadiya jinan ev armanc têk bir. Di heman demê de, armanc ew bû ku Rojhilata Navîn û gelên wê bikişînin nav pencên şer, wan ber bi kaos û hilweşînek mezin ve bibin. Rêya derketina ji vê kaos û tengahiyê avakirina civatek demokratîk li her derê ye. Em jin soz didin ku em ê di her qada jiyanê de komunên xwe ava bikin, bi hêvî û baweriyê pêvajoya aştî û civaka demokratîk bi rê ve bibin û em ê têkoşîna xwe mezin bikin heya ku em bi Rêberê Azad û jinên azad bigihîjin civatek azad. Em bang li hemû jinên ku dilê wan bi hêviya aştiyê lê dide dikin ku bi vî rih û coşê bi hev re jiyaneke azad bi rê ve bibin û bijîn.”