Amed – Bi pêşengiya Xwendekarên Komînalîst, bi dirûşma ‘Dem dema rêxistinbûnê bi kampusên komînalîzekirî ye’ li Navenda Kongreyê ya Çand Amedê  konferansek hat lidarxistin.

Bi sedan xwendekar ji zanîngehên Kurdistan û Tirkiyeyê, Dayîkên Aştiyê, Tevgera Jinên Azad (TJA), nûnerên partiyên siyasî û rêxistinên civaka sivîl beşdarî konferansê bûn. Ciwanan gelek caran dirûşmên wek ‘Bê Serok Jiyan Nabe’, ‘Bijî Serok Apo’, ‘Şehîd Namirin’, ‘Bijî Berxwedana Ciwanan’ û ‘Bijî Berxwedana Zindanan’ qîr kirin.

Konferansê bi deqeyek rêzgirtina ji bo bîranîna kesên di têkoşîna azadiyê de jiyana xwe ji dest dane dest pê kir. Di rêzgirtinê de ciwanan sirûda ‘Çerxa Şoreşê’ xwendin.

‘Rêber Apo li cihekî ku her dem dibêje ‘Ez her dem ciwan im’ disekine’

Aktîvîsta TJA’yê Nesrîn Akgul axaftinek kir û wiha got: “Ev xaleke destpêkê ye. Xaleke destpêkê her dem armancek destnîşan dike. Îdealên me hene ku danîna armancan dikin pêwîstiyek, doktrînek ku alî dide jiyana me. Gelê Kurd ev doktrîn ji tevgera Apogerî girt. Bi vî rengî dê bikeve dîrokê. Îro ev tevger di xala destpêkê ya nû de ye. Em bi biryar in ku vê xala destpêkê bi îdealên mezin bidomînin. Bi dîtina we min dîsa xwe ciwan hîs kir. Em bêhtir bi heyecan û serbilind bûn. Bi vê moralê, me berfirehkirina têkoşînê hîs kir. Rêber Apo di cihekî wisa de ku dibêje: ‘Ez her dem ciwan im’ disekine. Ev tiştekî civakî ye ku ji rastiya biyolojîk derbas dibe. Dema ez jî li we dinêrim, dibêjim ‘Ciwan dê çawa bikaribin her dem ciwan bimînin?’ Pêvajoya 27 salan a dîlgirtina Rêber Apo çîrokek bedew a ciwaniyê ye. Wî ev yek bi 27’ê Sibatê dîsa nîşan da, tevger û civak bi meraq, fikar û hestên nû ciwan kir. Çawa rêberê gelekî tevî hemû şert û mercên tecrîdê ciwan ma? Kesê bi qasî Rêber Apo li dijî dogmatîzmê re şer nekiriye. Hevalno, qet dogmatîk nebin. Divê hûn wisa nebin. Tiştê ku herî zêde ciwanan diêşîne dogmatîzm e. Dogmatîzm pêşketinê asteng dike, îdealan sînordar dike û kêm dike. Şerê li dijî dogmatîzmê tê wateya ku li hemberî her kesê nerm be, fêr bibe ku bi kesên li derveyî xwe re bijî.”

Nesrîn Akgul bal kişand ser têkoşîna jinên Kurd kir û got ku weke jinek Kurd, wê çîroka xwe nivîsandiye û wiha got: “Weke jinek ciwan, min got her çendî xelet be jî ez dixwazim xwedî hêz û îradeya xwe bim. Min got, em bi hev re bin. Îro dema ku em li vê derê dinêrin, dibînin ku me pênaseyeke nû daye wêrekiyê.

Wêrekî hêza guhertin û kirina tiştekî ye. Hûn mînakek ji vê cesaretê ne. Bi vê cesaretê, mirov dikare civakê biguherîne û veguherîne. Rêber Apo jî bi cesareta ciwan dest pê kir. Li cihekî ku kesê nedigot ‘Kurd’ an ‘Kurdistan’, wî têkoşînê bi gotina ‘Kurd hene, Kurdistan Mêtinger e’ dest pê kir. Got, ‘Ew bû ciwanek rastiya xwe îsbat kir’ û destnîşan kir ku her kesê li Kurdistanê şer dike xwedî çîrokeke bi  cesaret e.”

‘Em ê bibêjin em ê bi ser bikevin’

Nesrîn Akgul, bal kişand ku Rêberê Gelê Kurd Abdullah Ocalan bi destpêkirina pêvajoya danûstandinê cesareteke mezin nîşan daye û ev tişt got: “Rêber Apo got, ‘Em ê danûstandinê bikin.’ Hinekan jê re digotin teslîmbûn, hinekan jê re digotin xiyanet, hinekan jî jê re digotin têkçûn. Lê Rêber Apo cesareteke mezin nîşan da û riya xwe domand û îsrar kir. Ji ber vê ye Rêber Apo ciwan e û dibêje 'Tevgera Ciwanan.' Em jî dê cesaret bikin ku biguherînin, veguherînin. Netirsin, bibêjin em ê bi ser bikevin. Em dizanin ku astengî hene. Profîlek nû ya ciwanan û civakê heye. Di serdema xwerêveberiyê de mînakek mezin a cesaretê hebû. Em ê bibêjin em ê bi ser bikevin, em ê bi ser bikevin, em ê bi ser bikevin."

Piştî axaftinan, sînevîzyona li ser têkoşîna ciwanan hatibû amadekirin hat nîşandan.

Piştre, peyamên ji komîn û rêxistinên ciwanan ên li Kurdistan, Tirkiye û çar aliyên cîhanê hatin xwendin. Di peyaman de hat destnîşankirin ku pêşeroj di destên ciwanan de ye û divê ew bi vê hişmendiyê tevbigerin. Hat destnîşankirin ku piştgiriya wan a hevbeş bêyî ku mesafeya di navbera wan de çi be berdewam dike.

Di Peyama ji aliyê xwendekarên zanîngehê yên li Rojava hat şandin de bal hat kişandin ser Pêvajoya Aştî û Muzakereyê ya ku ji aliyê Rêberê Gelê Kurd Abdullah Ocalan ve hatiye destpêkirin û banga azadiya Rêberê Gelê Kurd Abdullah Ocalan hat kirin.

Konferansê ji çapemeniyê re girtî berdewam dike û dê bi hilbijartina endamên meclîsê û îlankirina meclîsê bi dawî bibe.