NÛRŞAN EBDÎ

Kobanê – Di 9’ê Cotmehê de, parêzgeha Hesekê bi êrîşên ku saziyên xizmetê, wêneyên şehîdan û sembolên Kurdî yên têkoşîna jinan temsîl dikin hedef hat girtin. Ev êrîş bûn sedema aloziyên ewlehiyê, bêaramiya herêmê û pevçûnên di navbera aliyên Sûriyeyê de gur bûn.

Bûyerên dawî yên li parêzgeha Hesekê li seranserê Rojava, bi taybetî li bajarê Kobanê, nerazîbûneke berfireh a raya giştî derxist holê. Jinên Kobanê der barê van êrîşan de nêrînên xwe anîn ziman.

‘Kiryarên li dijî nirx û prensîbên mirovan nayên qebûlkirin’

Bakîre Sincar bûyerên dawî yên li Hesekê şermezar kir û diyar kir ku serdema niha ji bo Kurdên Sûriyeyê bi taybetî hesas e. Her wiha destnîşan kir ku li herêmê pêvajoyeke entegrasyonê ya pêşketî di navbera herêmê û hêzên Rojava û hikûmeta demkî ya Sûriyeyê de dimeşe û wiha berdewam kir: "Bi temamkirina vê pêvajoyê, em armanc dikin mafên xwe di hemû aliyên çandî, zimanî û siyasî de bi yasayî saz bikin. Helwesta hêz û gelên li herêmê der barê piştgiriya pêvajoya entegrasyona demokratîk a li Sûriyeyê de zelal e.”

‘Êrîşên li ser nirxên me hewldana wêrankirinê ye’

Bakîre Sîncar da zanîn ku hinek alî hene hewl didin zirarê bidin pêvajoyê û wiha domand: "Em şahidên hewldan û êrîşên berdewam in ku bi çêkirina nakokiyan di navbera komên cuda de, bi taybetî jî hedefgirtina gelê Kurd, armanc dikin vê qonaxê têk bibin. Êrîşên li ser wêne û gorên şehîdan û sembolên şoreşa jinan wekî delîlên eşkere yên van hewldanên wêranker in. Gelê Rojava dê rê nede prensîbên wan werin binpêkirin an jî herêma wan bikeve nava şer û gengeşiyan. Êrîşa li ser sembolên tevgera jinan û wêneyên şervanên jin ên ku jiyana xwe ji bo azadiya jinan feda kirine, kiryareke xirab e û bi tu awayî nayê qebûlkirin, li dijî nirx û prensîbên miroviyê ye.”

Bakîre Sîncar tekez kir ku armanc bi van bûyerên li Hesekê ew e ku nasnameya jinan were tunekirin û destkeftiyên wan ên di salên piştî Şoreşa 19’ê Tîrmehê de bi dest xistine, ji holê werin rakirin û wiha got: “Em ê tu êrîşa li ser destkeftiyên xwe qebûl nekin û ji bo bi her awayî nasnameya xwe biparêzin çi ji destên me were em ê bikin.”

Bakîre Sîncar bang kir ku divê hesab ji kesên zirarê didin nirx û wêneyên şehîdan û êrîşî wan dikin were xwestin.

‘Êrîş li dijî rêgezên mirovî ne’

Leyla Ehmed a ji Kobanê jî diyar kir ku jinên Rojava her êrîşa li ser nasname û şoreşa jinan, saziyên wan û nirxên şehîdan red dikin, êrîşkaran wekî sabotajkarên ji prensîbên mirovî bêpar bi nav kir û tekez kir ku divê kesên sabotajkar werin cezakirin.

Leyla Ehmed bang li hemû pêkhateyên Sûriyeyê kir ku li dijî van sabotajkaran helwesteke tund nîşan bidin û tekez kir ku şehîd xeta sor in, kevirê bingehîn ê jiyana bi rûmet û pêkanîna projeya demokratîk in. Her wiha bêdengiya hikûmetê û nebûna hesabpirsîna ji komên sabotajkar şermezar kir.