RABÎA XERÎS

Cezayir – Di salên dawî de drama û sînema hewl didin balê bikşînin ser pirsgirêkên jinan. Ev berhem bûne neynika ku gelek aliyên jiyanê û êşên jinan nîşan dide. Bi taybetî li ser pirsgirêka tundî û cudakariyê ku jina Cezayirî rûbirû ye. Tevî van hewldanan jî dîsa destnîşan kirin ku ev di hêla çareserkirina pirsgirêkan de kêm maye.

'Drama nebû çareseriya pirsgirêkên jina Cezayîrî'

Nivîskar û romannivîsa Cezayîrî Ayşe Benûr diyar kir ku tevî hebûna jinan a di drama Cezayîrê de xuya dibe jî, ne di astek têrker de ye. Ayşe Benûr wiha got: "Ji ber ku drama mafê jinan tevî hebûna wê neda û nebû cîhê çareseriya pirsgirêkên wan. Jin weke mexdûr, bindest, îstîsmar û ji vîna xwe bêpar tên nîşandan, her tim di nava şert û mercên xirab ên civakî û malbatî de dijîn û sedem jî desthilatdariya mêr a serdest e. Hebûna jina Cezayîrî di drama de weke şekil û karekterên ku tenê teşwîq bikin cîh digrin."

'Dubarekirina çîrok û senaryoyê ne çareserî ye'

Wêjevan û nivîskar Selîma Melzî got ku dramaya Cezayîrê di van 20 salên dawî de bûye şahidê vejîn û cihêrengiya berhemanînê. Selîma Melzî wiha axivî: "Dramaya Cezayîrî bi çêkirina rêzefîlmên ku jinan û pirsgirêkên wan radixe ber çavan re karîbû pêşbaziyek xurt çêke. Dubarekirina heman fikir û xebatan di drama de heye. Ev dubarebûn jî tu çareseriyan bi xwe re peyda nake."

'Divê rola jinan di drama de çalak be'

Selîma Melzî di dawiya gotinên xwe de balkişand ser girîngiya rola jinan û wiha got: "Girîng e ku jin rola xwe di nivîsandina senaryoyan û guhertina qalibê kevneşopî de bilîze. Ev dem derfeteke ji bo jinên lîstikvan, derhêner û hilberîner rola xwe di dramaya Cezayîr de aktîf bikin. Ji bo ku jin bikaribe bêhtir û bi wayek rast balê bikşîne ser pirsgirêkên xwe yên jiyanî û bi mafên xwe bang bikin. Ji bo ku drama Cezayîrê bibe neynika jinan û di pêşkêşkirina çareseriyan de biser bikeve, divê ew vegere romanên ku bi kûrahî qala rastiya jiyanê dikin."