HENAN HERÊT

Mexrib – Bediya Nebîl a 63 salî ya sê zarokên wê hene, piştî salên dirêj ji xebatan û xizmetkirina malbatê, biryar da ku derfetek nû ji xwe re ava bike û tê de hebûna xwe kişif bike. Bediya Nebîl di hunera kevneşopî ya Mexribê de riya xwe îfadekirinê dît û hewl dide di parastina mîrateya neteweyî ya herêmê de xwe îsbat bike.

Ji malnişîniyê ber bi cîhana karên destan ve

Bediya Nebîl piştî temenê malnişîniyê li malê dimîne meraqên xwe yên hunerî kişif dike û dikeve nava hûrgiliyên karên destan. Bediya qala destpêkirina xwe ya pîşeya karên destan dike û dibêje: "Tu agahiyên min li ser çêkirina karên destan tunebûn. Dema ku li sûkê dimeşiyam jinên selik û kuman dixemlandin bala min kişandin. Min jî xwest weke van jinan hunera xwe bi pêş bixim. Encamên tecrubeya min a yekem nebaş bûn lê îradeya min xurtir bû, dizanibûm cara din ez ê baştir bikim. Ji ber vê min bi îsrar karê xwe berdewam kir. Min li ser selikek tabloyeke hunerî xêz kir. Vê tabloyê hişt ku meraqên min bi pêş bikevin û min hebûna di karên destan de bibînim."

‘Jin tenê çêkera karên destan nîn e, ew mîrateyê diparêze’

Bediya Nebîl dibêje ku ew tenê bi xemilandina kum û selikan sînordar nemaye û xebatên xwe berfirehtir kiriye. Bediya dibêje li kêleka karê xemilandina selik û kuman, ew hînî çêkirina xaliyên kevneşopî jî bûye û wiha didomîne: “Min xwest çanda dê û dapîrên xwe nûjen bikim. Jin tenê çêkera karên destan nîn e, ew mîrateyê ji bo nifşên nû zindî dike û parastina wê dike. Di çêkirina selik û xaliyan de rengên xwezayî bikar tîn im. Karê ez dikim, formek vegotina hunerî dibînim ku beşek ji giyanê min nîşan dide. Her rengek ku bikar tînim hezkiriya min ji hunerê re diyar dike."

Li hemberî kêşeyan bi îsrar dixebite

Bediya Nebîl di nava gotinên xwe de bal kişand ser kêşeyên ku rastî karê wê tên û diyar kir ku li hember hemû kêşeyan îrade û îsrar xwe dide pêş. Bediya wiha axivî: "Kêşeyên ku ez pê re dimînim buhabûna rêjeyên madeyên xam in. Tevî hemû astengî û zehmetiyan teslîmiyet qebûl nekir û di karê xwe de bi îsrar bûm. Bi piştevaniya zarok û neviyên xwe ez karê xwe dewam dikim. Di gelek pêşenghên karê destan de bi hilberînên xwe beşdar bûme. Di zindîkirina huner û çanda xwe de serbilind im."

Hunerê û berhemên destan hînî nifşan dike

Bediya Nebîl da zanîn ku ew huner û karê destan hînî jin û ciwanan dike û wiha dawî li gotinên xwe anî: "Ji bo zindîkirina vê çandê pêwist e jin û ciwan jî hîn bibin. Ez vê pîşeyê bi riya perwerdeyan didim jin û ciwanan. Bawer im ku jinên Mexribî parêzvanên rast ên mîrateya me ne. Eger em vê mîrasê fêrî nifşan nekin ew ê bi xeteriyên pişaftinê re bimîne. Hînbûn û meraq temen nas nake. Ji ber vê her jina ku meraqa xwe di karên destan û hunerê de dibîne bila xeyalên xwe pêk bîne û di zindîkirina çanda xwe de hebûna xwe îsbat bike."