SORGUL ŞÊXO

Tişrîn – Berxwedana Bendava Tişrînê ya ku bi armanca parastina av û cereyana xwe, gelê Bakur û Rojhilatê Sûriyeyê 8’ê Çileyê dest pê kirin, berdewam dike. Ji lewre di parastina bendavê de ji zarokên 7 salî heta 70 salî cih digrin. Ji hemû beşên civakê mirov ji bo parastina Bendava Tişrînê nobedariyê dikin.

Bêguman her hatinek sozdayîneke nû ye, her hatin berxwedaniyek e. Di bin firîna balafirên şer û balafirên xwekuj de, meşa gel a ber bi bendavê û dîlana wan şeqameke qewîn li rûyê dagirkeran dide.

Şerê gelê şoreşgerî hêvî û xeyalên ddagirkeriyê têk birin, bi govenda dayikek û tilîliyên wê hemû êrîş bombebaran û topbaran tên têkbirin. Dewleta Tirk hesabê berxwedaniya gelê ji pola nedikir, ji bo wê ev zêdetirî 3 meh in hewl dide Bendava Tişrînê dagir bike. Berxwedaniyeke efsanewî tê meşandin ku hêza gel dikaribû hesabê dewletan serûbin bike û bibe hêzeke bi bandor hevsengiya şer û herêmê biguherîne.

Hunermend Mizgîn Mehmûd a ku ji Qamişloyê ye û di berxwedana bendavê de cih digre, ji bo çalakgeran straneke têkoşer Hozan Mizgîn a nemir dibêje. Dengê Mizgîn a Rojava dişibe dengê Hozan Mizgîn.

Mizgîn Mehmûd bi temenê xwe yê 50 salî, bi xebatên xwe yên hunerî dibe şopdara Hozan Mizgîn û li ser Bendava Tişrînê li dijî êrîşên dewleta Tirk a dagirker li ber xwe dide. 

‘Hebûna hunermendan di nava civaka xwe de ye’

Mizgîn Mehmûd got ku di berxwedana Bendava Tişrînê de weke sazî û dezgehên hunerî dikaribûn xebatên pir xweş û balkêş ku berxwedanê nîşan didin bikin û wiha domand: “Hunermendan bi stran û klîban, bi wêneyên ku çêkirin dikaribûn rola xwe bilîzin. Bi vê boneyê jî em şanogerê xwe yê Kurdistanî Bavê Teyar ku li ser vê bendavê di encama bombebarana dagirkeriya Tirk de şehîd bû, bi bîr tînin. Erka me hunermendan ew e ku em di nava civaka xwe de bin, ji lewre pêkanîna erkên xwe yên welatparêzî berpirsyariyeke wijdanî ye.”

Li cihê ku êrîş çêdibin şano tê çêkirin

Mizgîn Mehmûd got ku cîhan ji ber berxwedana bendavê şok bûye û wiha sedema wê anî ziman: “Li cihê ku êrîş hene, bombebaran çêdibe û mirov şehîd dikevin, govend tê gerandin, lîstikên şanoyê tên çêkirin û wêne tên xêzkirin. Sedem ew e ku em bi her şehadetê soza xwe nû dikin. Li vir careke din bi bîranîna şehîdên bendavê soza xwe em nû dikin heta bigihîjin serkeftinê.”

Ji 3 pîroziyên ku Rêber Apo bi nav kirine yek jê hunermend in

Hozan Mizgîn gotinên Rêber Abdullah Ocalan bi bîr xist û her sê tiştên pîroz ên ku gotine wiha bi lêv kir: “Rêber Apo 3 tiştên pîroz bi nav dike. Ew sê tişt pêxember, hunermend û rewşenbîr in. Ji lewre di vir de erka me hunermendan pir giran dibe, erk û berpirsyariyên me li hemberî pêvajoyê zêde dibin. Divê em bikaribin êş û şahiyên civaka xwe bi awayekî stran, şano û wêneyan belge bikin. Îro karekî pir pîroz bê tirs û bê dudilî li ser vê bendavê tê meşandin. Li vir, her kes bi erkê xwe radibe bêyî ku ferqa temen hebe.”

Hozan Mizgîn, ji bo heyva Adarê got ku heyva serhildan û komkujiyan e û wiha dawî li axaftina xwe anî: “Adar ji bo me gelek girîng û taybet e, meha berxwedan serhildan û komkujiyên li dijî gelê Kurd e. Em ber bi 21’ê Adarê ango roja Newrozê ve diçin. Em bi hêvî ne ev sal bibe sala serkeftinê. Her wiha em bi hêviya ku Newroz 2025’an bibe sala azadiya fizîkî ya Rêber Apo dijîn. Em hêvî dikin pirsgirêkên li Sûriyeyê çareser bibin û em di wê baweriyê de ne ku xebatên tên kirin wê bi serkeftinê bi encam bibin.”