HENAN HARÊTE

Mexrib- Paytexta Mexribê Rabat ku bi plansaziya bajar balê dikşîne, sala 2012’an ket Lîsteya Mîrasên Cîhanê ya UNESCO’yê. Li bajarê Rabatê ku bi çanda xwe ya cuda tê ecibandin, qada arkeolojîk a bi navê "Chellah" tê zanîn heye. Hunermenda Mexribî Doha Mohîb a ku li nêzê qada  Chellah dijî, bi berhemên xwe yên hunerî çanda bajar nîşan dide.

Doha Mohîb piştî ku di zewacê de pirsgirêkên wê çêbûn berê xwe da hunerê û biryar da dest bi riyeke nû bike. Doha Mohîb her çendî riya ku ketibûyî hêsan nebû jî zoriyan veguherand derfetan, jiyana xwe ji nû ve ava kir. Doha Mohîb a ku bi hunera xêzkirina li ser cam re têkildar e, got ku di ji ber meraqa wê hebûye dest bi vê hunerê kiriye.

Doha Mohîb diyar kir ku tevî dahata wê kêm bû jî malzemeyên ku jê re pêwist bûne kiriye û wiha domand: “Her ku dem derbas bû, wêneyên ku min li ser cam xêz kirin, bûn perçeyek ji min. Min hîs kir ku benê wê hunera qedîm di dest min de ye. Min dît ku çêkirina weneyan li ser cam, ji hunerên xweşik bi temamî cuda ye. Cudahiya di navberê de ew e ku; cam xwedî taybetmendiyên xweser e û divê bi baldarî were bikaranîn. Ez ji rengên xwezayî, kesk ê ku xwezayê temsîl dike, rengê zer ê ku temsîla xweşbîniyê ye, rengê sor ê ku hezkirinê temsîl dike û rengê şîn ê ku tê wateya asîman û rengê spî yê ku tê wateya aştiyê hez dikim. Van rengan mijara sereke ya hunera min xweşikbûna jinan û hêza wan nîşan didin.”

‘Ez rengên ku balê dikşînin ser kesayeta jinan bi kar tînim’

Doha Mohîb diyar kir ku ew rengên ku balê dikşîne ser kesayeta jinên Mexribî bi kar tîne û got: “Di wêneyên xwe de her dem di her hûrgiliya berhemê de ez hewl didim xweşikbûn û hêza jinan derxim pêş. Ji bo min jin, ne tenê mijara xêzkirinê ne, her dem dibin çavkaniyê îlhamê. Ji bo balê bikşînim ser astên cuda yên kesayeta jinan, hem rengên biriqandî hem jî girtî bi kar tînim.”

‘Di wêneyên min de peyamên hêvî û biryardariyê hene’

Doha Mohîb diyar kir ku di warê hunera xêzkirin û plastîk de gelek teknîkên nûjen hîn bûye û hînî jinên din kiriye û got ku tevî zoriyên di warê hunerê de dikşîne jî hêviya xwe winda nake û didomîne. Doha Mohîb wiha bi dawî kir: "Ji bo mirov hunera jê hez dike bike divê gava pêşîn bavêje. A girîng ew e ku mirov bawer bike tu tişt li tewşê naçe. Her ked û hewldan di emcanê de berhemek dide. Dema ku jinek bi hêvî û îsrar tevbigere dikare rotaya jiyana xwe biguherîne û di civakê de şopeke bi hêz bihêle. Di wêneyên xwe de ez xweşikbûna jinan bi hemû hûrgiliyan derdixim holê. Di wêneyên min de peyamên hêvî û biryardariyê hene. Ez rola jinan a di civakê de, behremendiya guherîn û afirandinê derdixim pêş.”