ناوەندی هەواڵ

 

بەیانی ئەمڕۆ کاتژمێر ١٠:١٨، لەناو بینای وەزارەتی کارەبا لە شاری هەولێر، پیاوێکی فەرمانبەر، تەقە لە ژنێکی ئەندازیار کە فەرمانبەری هەمان وەزارەت بووە، دەکات و لەپاش چەند سەعاتێک لە نەخۆشخانەی فریاکەوتنی هەولێر ژنەکە گیانی لەدەستدا.

 

ژنە کوژراوەکە ناوی شادی عەبدوڵایە و ئەندازیار بووە لە وەزارەتی کارەبای حکومەتی هەرێمی کوردستان، بکوژەکەش هەر لە هەمان وەزارەت کارمەند بووە، بەپێی زانیارییەکان لەدوای ئەوەی گفتوگۆیەک لەنێوان ژنە کوژراوەکە و تاوانباردا دروست دەبێت، تاوانبار دوو گولـلە دەنێت بە ژنەکەوە، هەرزوو تاوانبار دەستگیردەکرێت و ژنەکەش ڕەوانەی نەخۆشخانەی فریاکەوتنی هەولێر دەکرێت.

بەڵام لەدوای چەند کاتژمێرێک لە نەخۆشخانە شادی عەبدوڵا گیان لەدەستدەدات.

 

لە ڕاگەیاندراوێکی وەزارەتی كارەبای حكومەتی ھەرێمی كوردستان هاتووە: "بەداخ و پەژارەیەكی زۆرەوە ئەمڕۆ كاتژمێر ١٠:١٨خولەکی سەرلەبەیانی رێكەوتی ٢٩/٣/٢٠٢١ لە كارەساتێكی دڵتەزێندا ئەندازیار شادی عەبدوڵڵا فەرمانبەری بەڕێوەبەرایەتی گشتی دابەشكردنی وەزارەتی كارەبا لەكاتی دەوامی فەرمی خۆیدا لەلایەن فەرمانبەرێكی دیكەی وەزارەتی كارەباوە بە دەمانجە كوژرا و لەلایەن پاسەوانەكانی وەزارەتەوە دەستگیركرا و دواتر راستەوخۆ هێزە ئەمنیەكان بكوژەكەیان دەستگیركرد".

 

ت.پ