لە سلێمانی ژنێک بە شێوەی گوماناوی گیانی لەدەستدا
شەوی ڕابردوو ژنێکی خەڵکی سەیدسادق و دانیشتووی شارۆچکەی بازیان لە سنووری سلێمانی لە ماڵەکەی خۆیدا بە شێوەی گوماناوی گیانی لەدەستدا.
ناوەندی هەواڵ
عەقڵیەتی پیاوسالاری کە هەمیشە خواستی لەناوبردنی ژنە، کوشتنی ژنانی ڕەوا کردووەو ئێستا بۆ دەرچوون لە سزاو یاسا ژنان ناچار بە خۆکوشتن دەکات، هەربۆیە گیان لەدەستدانی گوماناوی ژنان زیادبووە.
لە نوێترین ڕووداودا شەوی ڕابردوو ٢ی نیسان، ژنێکی خەڵکی سەیدسادق، كە دانیشتووی شارۆچكەی بازیانەو دایكی دوو منداڵە، لە ماڵەکەی خۆیدا بە شێوەی گوماناوی گیانی لەدەستدا و تا ئێستا هۆکارەکەی نەزانراوە.
لە لایەن پۆلیسی سلێمانی پەڕاوی لێکۆڵینەوەی بۆ کراوەتەوە و تا ئێستا هۆکارەکە روون نەکراوەتەوە، کە ڕووداوەکە کوشتن بووە یان ناچار بەخۆکوشتن کراوە.
لە سێ مانگی یەکەمی ئەمساڵدا ٧ ژن لە باشووری کوردستان کوژراون و ٥ ژنیش بە شێوەی گوماناوی گیانیان لەدەستداوە.