بەرچەم جودی

 

کۆبانێ-لە شێخ مەقسود و ئەشرەفیە، خەڵک و خەباتکاران بە پتەو و ئیرادە وەستابوون، سەرپێچی لە ناهاوسەنگی هێز و بەرجەستەکردنی ئیرادەیەکی پێکەوەی نەشکاو دەکەن، ئەوان هێڵێکی تۆکمەی بەرگریان لەسەر بنەمای بەهاکانی ئازادی و دیموکراتیک و مافەکانی ژنان دامەزراند و دووپاتیان کردەوە، کە هێزی ئیرادەی گەل دەتوانێت سەروەری لە چەک و ژمارەدا زاڵ بێت و کاتێک مرۆڤەکان بە مافی ژیان و شکۆنەندیەوە خۆیان دەچەسپێنن، ناتوانن شکستیان پێبهێنن.

 

جیهادییەکانی هەتەشە و چەتەکانی داگیرکەری تورکیا کە دەیان هەزار کەسیان شانبەشانی تانک و فڕۆکەی بێفڕۆکەوان جێگیر کرد، هێرشێکی بەرفراوانیان کردە سەر گەڕەکەکانی شێخ مەقسود و ئەشرەفیەی شاری حەلەب، سەرەڕای جیاوازییەکی بەرچاو لە ژمارە و کەرەستەدا، دانیشتووان و شەڕڤانان بە بەرخۆدانی قارەمانانەی بێهاوتای ئەم هێرشانە بەرەوڕووی یەکتر بوونەتەوە.

 

"سووریا ڕووبەڕووی سیاسەتی مەترسیدارتر و ئاڵۆزتر دەبێتەوە"

مزگین خەلیل، هاوسەرۆکی ئەنجومەنی جێبەجێکاری کانتۆنی فورات لە باکوور و ڕۆژهەڵاتی سووریا ڕایگەیاند کە هێرشەکان و ئەو بەرخۆدانە قارەمانانەی کە خەڵک و شەڕڤانان لە ڕووبەڕووبوونەوەیاندا نیشانیان داوە، بە وردی هەڵسەنگێندراوە، ئەوەی ڕوویدا ڕەنگدانەوەی ئیرادەیەکی بەکۆمەڵ و پتەوی بەرگریکردنە لە خاک و کەرامەت.

 

دووپاتی کردەوە، کە هەموو پێکهاتەکانی باکوور و ڕۆژهەڵاتی سووریا ڕۆڵێکی بنەڕەتییان لە شۆڕشی ڕۆژئاوادا گێڕاوە کە ١٤ ساڵە بەردەوامە، ئەم شۆڕشە وەرچەرخانێکی مێژوویی لە ڕووبەڕووبوونەوە لەگەڵ ستەمی ڕژێمی پێشووی سووریا و هەموو جۆرەکانی جینۆساید پێکهێنا، نموونەیەکی نوێی خستەڕوو کە لەسەر بنەمای دیموکراتی، دادپەروەری، ئازادی و یەکسانی دامەزراوە، گەلەکەمان هیواکانی لەسەر داڕشتووە. لە بەرامبەر ستەمکاریدا، هەوڵیاندا سیستەمێکی جێگرەوە دادپەروەرانەتر و مرۆڤانەتر بونیاد بنێن، بەداخەوە سووریا ئەمڕۆ ڕووبەڕووی ئاڵەنگاری گەورەتر و سیاسەتی مەترسیدارتر و ئاڵۆزتر دەبێتەوە، ئەمەش وایکردووە قەیرانی سووریا هێندەی تر ئاڵۆزتر و پێکەوەلکاوتر بێت.

 

"هێرشەکان ڕاستەوخۆ سیستەمی خۆبەڕێوەبردنیان کردە ئامانج"

جەختی لەوە کردەوە کە پڕۆژەی خۆبەڕێوەبردن نوێنەرایەتی نموونەیەکی سیاسی و کۆمەڵایەتی دەکات کە مافی هەموو پێکهاتەکانی کۆمەڵگە مسۆگەر دەکات، هەموو ئەم هێرشانە بە پلەی یەکەم پڕۆژەی خۆبەڕێوەبردنیان کردە ئامانج، بەو پێیەی نموونەیەکە بۆ خزمەتکردنی هەموو گەلانی ناوچەکە داڕێژراوە، شوێنی بەشداریکردنیان پێدەبەخشێت بەپێی کولتوور و زمان و ناسنامەکەیان، تا ئەمڕۆش لەسەر ڕێبازەکەی بەردەوام بووە، لەگەڵ ئەوەشدا لە ساڵانی ڕابردوودا ڕووبەڕووی هێرشی زۆر و جیاواز بووەتەوە.

 

ڕوونیشیکردەوە، هێزەکانی دەسەڵاتدار شەڕێکیان لەدژی سیستمی ناناوەندی و دیموکراتیک دەستپێکرد و هەر لەبەر ئەم هۆکارەش هێرشی بەردەوام لەلایەن هێزە ڕەگەزپەرست و خێڵەکی و جیهادییەکانەوە دەستیپێکرد کە بە وەکالەت کاردەکەن، بەتایبەتی دەوڵەتی تورکیا ڕۆڵێکی گەورەی هەبوو لەو شەڕەدا کە ئامانج لێی نەهێشتنی پڕۆژەی خۆبەڕێوەبردن بوو.

 

“ئەوەی لە حەلەب ڕوویدا، دەتوانرێت بە درێژکراوەی هێرشەکانی پێشووی داعش هەژمار بکرێت"

دووپاتی کردەوە، کە ئەو هێرشانە لە بنەڕەتدا هەوڵێک بوون بۆ شاردنەوەی ئەو هێزانەی کە هەوڵی نەهێشتنی پڕۆژەی خۆبەڕێوەبەری دەدەن، ئەمەش وایکردووە ئۆپەراسیۆنەکە بەرفراوان بێت و چەندین هێزی تێدا بەشداربووە، ئەوەی لە حەلەب ڕوویدا دەکرێت بە درێژکردنەوەی هێرشەکانی پێشووی داعش هەژمار بکرێت، بەو پێیەی بە ڕوونی بوونی خۆی لەم هێرشانەدا نیشان دا،بەڵام جیاوازی ئەمجارە ئەوەیە کە ئەم گروپە چەکدارانە بە ناوی ئەو گروپە چەکدارانە ڕێکخراون لە سوپای حکومەتی کاتی.

 

مزگین وتی: هێرشەکان ڕاستەوخۆ پڕۆژەی خۆبەڕێوەبردن و نزیکبوونەوەی ئازادی ژنان بە تایبەتی کردۆتە ئامانج، هەروەها خۆبەڕێوەبردن نموونەیەکی کۆمەڵایەتی بەشدارانەی پێشکەش کرد کە لەسەر ڕۆڵی پێشەنگانەی ژنان بونیاد نرابوو، ژنان توانییان لە قۆناغە جیاوازەکانی شۆڕشدا ڕۆڵێکی دیار و کاریگەر بگێڕن، هەروەها دەمەوێت بە تایبەتی ئاماژە بەو

قوربانیدانانە و ڕۆڵی پێشەنگایەتیانە دەکەم کە ژنان لە بەرەکانی پێشەوە هەڵیانگرتووە.

 

"قوربانیدانی ژنان لە حەلەب پشتڕاستی کردەوە کە ژنان لە پێشەنگی شۆڕشدان"

ئاماژەی بەوەشکرد، لە شەڕەکانی حەلەبیشدا بینیمان ژنان پێشەنگایەتیان دەکرد، ژنانی شەڕڤانی هێزەکانی ئاسایش بە بوێرییەکی زۆرەوە ڕۆڵی پێشەنگانەیان بینی، تەنانەت لەو ڕاگەیاندنانەی کە بڵاوکرانەوە، ژنان بۆ ڕووبەڕووبوونەوەی هەوڵەکانی سڕینەوەی ناسنامەییان بە مەرگ و بەرخۆدانی شەرەفمەندانەیان هەڵبژارد، ژنان نەک تەنها بەشێکن لە شۆڕش، بەڵکو لە پێشەنگی شۆڕشەکەدان.

 

تیشکی خستە سەر ڕۆڵی قارەمانانەی ژنانی کورد لە شاری حەلەب، جەختی لەوە کردەوە، کە هێڵی ئازادی ژنان هێڵێکی سوورە ناتوانرێت تێپەڕێنرێت، بۆیە شەڕڤانان چ ژن و پیاو، قوربانییان دا بۆ پاراستنی، شەڕی توندیان لەدژی دەیان هەزار چەکدار ئەنجامدا و سەرەڕای ناهاوسەنگی هێز توانیان بەرگری لە پێگەکانیان بکەن.

 

ئاماژەی بەوەشکرد، لە سەرەتای شۆڕشەوە، باوەڕ و بەڵێن و فەلسەفەمان ئەوە بووە کە خەباتی ژنان لە بەرخۆدانی شێخ مەقسود و ئەشرەفیە بە زیندوویی دەمێنێتەوە، دەزانین هێزەکانمان لەگەڵ هاوپەیمانی نێودەوڵەتی، شەڕی یەکلاکەرەوەیان لە دژی داعش کرد، کە تێیدا ژنان ڕۆڵێکی ستراتیژییان لە شکستەکەیدا گێڕا و دامەزراند، بەڵام لە حەلەب چی ڕوویدا ئەو ژنانەی کە ڕووبەڕووی داعش بوونەتەوە و تیرۆریزمەکەیان بنبڕ کرد، ڕاستەوخۆ کرانە ئامانج، جەستەیان لە سەربانەکانەوە فڕێدرایە خوارەوە لە دیمەنێکی توندڕەودا کە سروشتی ڕاستەقینەی ئایدیۆلۆژیای توندڕەوی ئاشکرا دەکات.

 

هاوسەرۆکی ئەنجومەنی جێبەجێکاری کانتۆنی فورات، مزگین خەلیل، لە کۆتایی هەڵسەنگاندنەکانیدا، وتی: بەرخۆدانی تێکۆشەرانی شێخ مەقسود ڕۆحی قوربانیدان لە پێناو پڕۆژەی ئازادی بەرجەستە کرد، تێکۆشانیان لە شێخ مەقسود نوێنەرایەتی ڕاستەقینەترین دەربڕینی بەها کۆمەڵایەتیەکانمان و ئەو بنەمایانەی ئێمە باوەڕمان پێیانە بوو، بۆیە ئەوان بوون بە شەهیدی ئەم پڕۆژە دیموکراتیکییە، بەڵێنیان پێدەدەین ئەو ڕێگایەی کە خەباتکارانی بەرخۆدانی حەلەب نوێنەرایەتی دەکەن هەرگیز ناوەستێت، بەڵکو بە زیندووی و نوێ دەبێتەوە، میراسەکەیان دەکەینە چرایەک بۆ ڕێنماییکردنمان بەرەو سەرکەوتن، بۆ ئەوەی قوربانیدانەکانیان وەک سەرچاوەی هێز و ئیلهام بۆ نەوەکانی داهاتوو بمێنێتەوە.