ناوەندی هەواڵ

 

نزیکەی هەفتەیەک دەبێت، ژنانی چالاکوان کەوتوونەتە بەر هێرشی ژمارەیەک هاککەر، کە پەڕەی فەرمییان لە تۆڕە کۆمەڵایەتییەکان و بەتایبەت فەیسبووک هاک دەکرێت، لەوانە دڵسۆز زەنگەنە، سەرۆکی ڕێکخراوی دابین، هودا زەنگەنە، چالاکوان، بەهرە حەمە ڕەشید، چالاکوان، لەنجە عەبدوڵا، چالاکوان و چەندین ژنی دیکە.

 

بەهۆی ئەم هێرشەی کە کراوەتە سەر ژنان، هاوپەیمانی ژنانی کوردستان بەیاننامەیەکیان بڵاوکردەووە، تێیدا ئاماژە بۆ ئەوەکراوە، ئەگەرچی تۆڕە کۆمەڵایەتییەکان بوونەتە مینبەرێک بۆ ڕێکخراوەکانی ژنان و چالاکوانان تا هۆشیاری بڵاوبکەنەوە، بەڵام ئێستا لەلایەن "گروپێک کەسەوە کە چاویان بە توانا و پێشکەوتنی ژنان هەڵنایەت و دەیانەوێت ژنان بگەڕێنەوە بۆ چوار دیواری ماڵ" ئەم هێرشە ئەنجام دەدەرێت.

 

ئەو هێرشانەی کە ئەنجام دەدرێن، خۆی دەبینێتەوە لە هاککردنی ئینستاگرام، فەیسبووک و ئیمێڵ، دروستکردنی پەڕەی ساختە بە ناوی چالاکوانانەوە و نامە ناردن بۆ خەڵک، ناردنی نامە و هەڕەشە لەلایەن ئەو ژمارانەی لە کۆمپانیاکانی پەیوەندیکردنەوە تۆمار نەکراون، هاککردنی ئەو زووم و چالاکیانەی لە تۆڕە کۆمەڵایەتییەکان ئەنجام دەدرێت، هەروەها دروستکردنی وێنە و ڤیدیۆی نەشیاو بۆ ژنان و بڵاوکردنەوەیان.

 

لەبەر ئەوە ئەو هاوپەیمانییەتییە داوا لە وەزارەتی ناوخۆ و لایەنە پەیوەندیدارەکان دەکات کە ئەم هێرشە بەهەند وەربگرن، لە ڕێگای تیمە شارەزاکانیانەوە هەوڵی دۆزینەوەی ئەو گروپانە بدەن، سیمکارتی بێ مۆڵەت قەدەغە بکرێت، هەروەها کۆمپانیاکانی پەیوەندیکردنیش وەڵامی دادگاکان بدەنەوە و زانیارییەکان بۆ دادگا بنێرن، وەزارەتی ناوخۆ تیمێک لە کەسانی پسپۆڕ بەو بوارە لە بەڕێوەبەرایەتی بەرەنگاربوونەوەی توندوتیژی دژی ژنان و خێزان دابنێن.

 

هاوپەیمانی ڕێکخراوەکانی کوردستان پێکهاتوون لە ١٥ ڕێکخراو و پێنج چالاکوانی بواری ژنان.

ت.پ