Navenda Nûçeyan – Nivîskar Rezîta Recaî ku li bajarê Reşt ê Îranê dijî, di 19’ê Tîrmehê de piştî ku ji aliyê 4’yemîn Şaxa Dozgeriya Reşt ve gazî wê kirin, li vir hat binçavkirin û sewqî girtîgeha Lakan a li Reştê hate kirin.

Li gorî Platforma Mafên Jinan, bang li Rezîta Recaî kirine ku bê dozgeriyê û derbarê sûcên wê de ew agahdar kirine. Dozger Alî Riza Bahşîpur ku lêpirsînê dimeşînê, piştî sûcdariyan biryara kefaleta 500 milyon tumen da. Lê belê tevî ku malbata wê di heman rojê de pereyê kefaletê razand jî, dadgehê ev qebûl nekir.

Dozgeriyê piştî du rojan agahî da malbatê, diyar kir ku heta şaxa dadgehê dem diyar neke dê Rezîta Recaî girtî bimîne û kefaletê jî di dema lêpirsînê de qebûl nakin.

Di nava sûcdariyên ku Rezîta Recaî pê tê sûcdarkirin de, ‘Propagandeya li dijî rejîmê’, ‘Belavkirina nûçeyên derew’, ‘Di qadên civakî de gera bê hîzar’ û ‘Agahiyên lêpirsîna destpêkê ya dozger îfşa kiriye’ cih digrin. Hate zanîn ku Rezîta Recaî niha li girtîgeha Lakan a li Reştê tê girtin.

Nivîskar Rezîta Recaî berê jî di Mijdara 2023’an de hatibû binçavkirin û ji aliyê 3’yemîn Şaxa Dadageha Şoreşê ya Reştê ve 4 sal û 1 meh cezayê girtîgehê lê hatibû birîn. Hate ragihandin ku ev ceza hê nehatiye înfazkirin.