STÊRA CAN 

ŞENGAL – Civaka Êzidî bi taybetî jinên Êzidî li ser banga Aştî û Civaka Demokratîk ku ji aliyê Rêberê Gelê Kurd Abdullah Ocalan ve hat kirin û ji bo pêkanîna ronesansa xwe, di navbera 17-18’ê Tîrmehê de 1’emîn Konferansa Ronakbîrî ya Şengalê bi dirûşma ‘Banga Civaka Demokratîk bersiva 74 Fermanan e’ li dar xistin. Konferans ji aliyê Akademiya Zanistên Civakî ya Abdullah Ocalan a Şengalê ve hat lidarxistin. Ji Şengalê û derveyî Şengalê 150 delege tevlî konferansê bûn. Di konferansê de mijara ku herî zêde li ser hat sekinandin û nîqaşkirin, Jineolojî bû.

Têkildarî konferansê jinên ku tevlî bûbûn bi kurtasî nêrînên xwe ji ajansa me re anîn ziman. Jinan diyar kirin ku konferans ji bo çareseriya pirsgirêkan, ji bo aştî û aramiyê û ji bo fermanan bersiva herî xurt e.

‘Êdî kes nikare pêşiya jinên birêxistinkirî bigre’

Endama Meclîsa Jinan a Borikê Tewrê Hisên destpêkê konferansê li Rêberê Gelê Kurd Abdullah Ocalan pîroz kir û ev tişt anî ziman: “Divê em piştî vê konferansê rêxistinbûna xwe xurttir bikin. Bang li jin û xortên Êzidxanê dikim ku tevlî rêxistinê bibin û xwe mezin bikin. Çi bikeve ser milên me em ê bikin û bi Rêber Apo re bimeşin. Kes nikare êdî pêşiya jinên ku xwe bi fikir û ramanên Rêber Apo birêxistin kirine û perwerde dîtine bigre.”

‘Konferans ji bo hemû fermanan bersiv e’

Endama Meclîsa Jinan a Borikê Welat Cano destnîşan kir ku konferans ji bo civaka Êzidî û hemû civakên bindest e û wiha got: “Ev konferans ji bo çareseriyan, ji bo aştî û aramiyê û ji bo fermanan bersiv e. Ev konferans bersiv e ji dijmin re û em ê weke jin bi hev re bi hêztir bibin, pêşengî ji pêvajoyê re bikin. Heta dawiyê em ê xwe li ser fikir û felsefeya Rêber Apo birêxistin bikin û xwe ji nû ve ava bikin. Bi taybetî jin weke jinên Êzidî, Ereb û kijan ol û neteweyan dibe bila bibe, em ê xwe li ser fikir û felsefeya Rêber Apo xurttir bikin.”

‘Jineolojî rastiya jinan û dîroka wan berbiçav dike’

Hevşaredara Xanesorê Maya Şingalî jî bi kurtasî ev tişt anî ziman: “Ez vê konferansê di serî de li Rêber Apo, şehîdên 74 fermanan, civaka Êzidî û jinan pîroz dikim. Hedefa me bi vê konferansê ew e ku em ronesansa xwe pêk bînin û xwe ji nû ve ava bikin. Em weke jinên Êzidî Jineolojiyê ji xwe re dikin bingeh. Jineolojî heqîqeta jin û civakan derdixe holê. Jineolojî rastiya jinan û dîroka wan berbiçav dike. Lazim e hemû jinên cîhanê li ser bingeha Jineolojiyê xwe nas bikin û rastiya xwe derxin holê.”