Amed – Meclîsa Ciwanan a Partiya Wekhevî û Demokrasiyê ya Gelan (DEM Partî), bi boneya 76’emîn rojbûna Rêberê Gelê Kurd Abdullah Ocalan, ji Amedê ber bi gundê Amara ya navçeya Xelfetî ya Rihayê ve meş lidar dixe. Starta meşê di 1’ê Nîsanê de hat dayin. Ciwan, meşa xwe bi dirûşma “Bi civaka demokratîk em ber bi azadiyê ve dimeşin” li dar dixin û meş wê piştî navçeyên Sewreg/Girê Sor û  Curnê Reş ên Rihayê, di 4’ê Nîsanê de li Amarayê bidawî bibe.

Bi dehan ciwan, jin û dayîkên ku li qada Şêx Seîd a Amedê hatin ba hev, dest bi maşê kirin. Tevî hewldanên astengiyên polîsan, coşa ciwanan a meşê bi stran, dirûşm û tilîliyan bal kişad. Ciwan bi govendê ketin otobusan, bi dua û tilîliyên dayîkan ketin rê. Tîmeke meşê ji jinên ciwan pêk tê. Ciwanên ku piştî Amedê destpêkê li Sewreg/Grê Sor, piştre ber bi Curnê Reş ve wê bimeşin, wê di 3’yê Nîsanê de li Curnê Reş mîhrîcanek lidar bixin. Piştî mîhrîcanê ciwan wê di 4’ê Nîsanê de li gel Platforma Saziyên Demokratîk û Tevgera Jinên Azad (TJA), ji navçeya Xelfetî ber bi Amara ve bimeşin. Jinên ciwan ên di meşê de cîh girtin, armanca meşê ji ajansa me re anîn ziman.

‘Ciwan wê bibin ên ku herî zêde di pêvajoyê de rol bilîzin’

Endama Meclîsa Ciwanan Havîn Varhan ku di meşê de cîh digre, diyar kir ku gelek bi kelacan e, anî ziman ku daxwaza wê ya yekem ew e ku tecrîda li ser Rêberê Gelê Kurd Abdullah Ocalan bi temamî rabe. Havîn Varhan da zanîn ku di meşê de wê di nava gel de di nava têkiliyan de bin û wiha got: “Ji ber ku em li pişt pêvajoya ku birêz Ocalan daye destpêkirin in û em destek dikin, me dest bi vê meşê kir. Destpêkê armanca me tecrîda heyî tavilê rabe ye. Bi gotina ‘Me bi ciwantî destpê kir, em ê bi ciwantî biserkevin’ ji bo di vê pêvajoyê de em rola aktîv bilîzin, em li qadê ne. Em destekê didin banga hatiye kirin. Bi rolgirtina ciwanan di vê pêvajoyê de, em baş dizanin wê pêvajo hê berhemdar û bi bandor be. Em bi giranî û girîngiya vê peyamê meşa xwe lidar dixin. Ji niha de em gelek bi coş û kelecan in. Em hemû gelan di 4’ê Nîsanê de vedixwînin Amarayê. Wê rojê em ê banga xwe ya aştî û azadiyê nû  bikin.”

‘Em ê aştî û azadiyê biqêrin’

Endama Meclîsa Ciwanan Dîlan Can diyar kir ku ciwan pêşengên pêvajoya aştiyê ne, da zanîn ku meş ji bo Rêberê Gelê Kurd Abdullah Ocalan hatiye destpêkirin û wiha got: “Em ciwan em ê di vê pêvajoyê de li kuderê bisekinin baş dizanin. Di vê riyê de û meşê de em  çiqas bi bawerî û hêvî ne, carek din emê nîşan bidin. Di nav van 4 rojan de, em ê bi hev re aştî û azadiyê biqêrin. Wê bi têkoşîna me ciwanan demokrasî û aştî jiyanî bibe. Em vêya baş dizanin. Ciwan pêşengên vê pêvajoyê ne. Ji bo ciwan bi awayek aktîv di vê pêvajoyê de cîh bigrin, em ê li qadan bin. Em ê li gel ciwanan li ser vê rêya bimeşin.”

Banga ji bo gelan

Fulya Taştan bi gotina: “Em ciwan ji bo vê meşê gelek kelcan in. Em di 4’ê Nîsanê de jî li benda vê kelecanê ne. Di vê pêvajoyê de daxwaza me ya herî mezin, mezinkirina banga aştiyê û rakirina tecrîdê ye. Em ê li gel gel vê rêyê bimeşin û em ê vê bangê bighînin her derê” bang li hemû gelan kir ku di 4’ê Nîsanê de li Amarayê bin.”