Şengal-  Artêşa Îraqê di 18’ê Adarê de li hember şervanên YBŞ’ê êrîşek pêk anî. Artêşê 5 şervanên YBŞ’ê dîl girtin. Li ser nerazîbûnan soza berdana şervanan hat dayîn, lê heta niha jî ev şervan nehatine berdan. Rêveberiya Xweser a Şengalê, têkildarî mijarê daxuyaniyek da. Daxuyanî li Şehîdgeha Şehîd Dilgeş û Şehîd Berxwedan, bi zimanê erebî hat dayîn.

Di daxuyaniyê de hat destnîşankirin ku êrîşa li hember hêzên YBŞ’ê ji Peymana 9’ê Cotmehê ne dûr e û ev tişt hatin vegotin: “Di 18’ê Adarê de, artêşa Îraqê bi hinceta ku kesek hatiye revandin, li hemberî hêzên YBŞ’ê li navenda bajarê Şengalê kemîn danîbûn. Tevî ku ew kes ne di destê YBŞ’ê de bû jî, hêzên Îraqê êrîşî şervanên YBŞ’ê kirin, 5 şervanên YBŞ’ê birîndar kirin û ew girtin. Piştî vê êrîşê jî dewletê, hêzên YBŞ’ê wek hêzên ne fermî binav kirin. Li şûna ku van hêzan wek hêzên ku di ber axa xwe de bi dehan şehîd dane û civak ji fermanê xilas kirine bihesibînin, şervanên YBŞ’ê wek hêzên ne fermî hesiband. Di vir de xuya dike û tê famkirin ku ev yek jî ji Peymana 9’ê Cotmehê ne qut e ku dixwazin vê peymanê pêk bînin. Pêwîst e dewleta Iraqê û hevkarên wê li ser civaka Êzidî bazariyê nekin.”

Di daxuyaniyê de hat diyarkirin ku Rêveberiya Xweser a Şengalê vî tiştê ku artêşa Îraqê pêk aniye bi tundî şermezar dike û wiha hat gotin: “Pêwîst e hikûmeta Îraqê ji civaka Êzidî û hêzên parastina Şengalê YBŞ’ê lêborînê bixwaze û wan şervan û birîndaran berde.”

‘Divê Iraq şervanên me berde’

Têkildarî mijarê, jinên Êzidî ji ajansa me re axivîn. Yek ji wan jî, xizma şervanê ku dîl hatiye girtin e.  Jina ciwan û xizma şervanê dîlgirtî Emîray Zozan destnîşan kir ku ji 19’ê Adarê ve 5 şervanên YBŞ’ê ji aliyê artêşa Îraqê ve dîl hatine girtin û wiha got: “Ji roja ku şervan hatine dîlgirtin û heta niha ji heft salî heta heftê salî em wek civak li ser piya ne. Em şer naxwazin, em dixwazin artêşa Îraqê bêyî pirsgirêk derxîne şervanên me bide me.”

‘Em tewambariyên Îraqê tu carî qebûl nakin’

Emîray Zozan bal kişand ser îdaiyên hikûmeta Îraqê ku dibêje şervanên dîlgirtî di lîsteya terorê de ne û wiha got: “Îraq îdia dike ku şervanên YBŞ’ê di lîsteya terorê de ne, lê ew zarokên vê civakê ne. Di sala 2014’an de li hember çeteyên DAIŞ’ê şer kirin û Şengal ji çeteyan rizgar kirin. Em vê nêzîkatiyê qebûl nakin. Artêş her roj dibêje em ê vê rojê berdin, em ê vî saetê berdin lê heta niha bernedan û her bi van gotina me mijûl dikin. Em vî tiştî qebûl nakin. Bila hikûmeta Îraqê baş bizanibe ku ger bersiva me erênî nede, dê em ê bi rêyên cur be cur çalakiyên cur be cur pêk bînin. Niha Şengal wek bombeyek e li dijî nêzîkatiya hikûmeta Îraqê, bila xwe nexapînin û nebêjin Şengal wek berê ye. Êdî wek berê hikûmeta Îraqê di nav civaka Êzidî de neyê qebûlkirin û rewa nayê dîtin, lazim e hikûmeta Îraqê vê bizanibe û wisa tevbigere. Divê şervanên me bêyî pirsgirêkan derxin berdin. Em ê çi dibe bila bibe, şervanên xwe ji destê wan derxin. Bila ev yek baş bê zanîn.”

‘Îraq di şûna çeteyan ceza bike şervanên me digire’

Jina bi navê Semîra Şingalî jî diyar kir ku hikûmeta Îraqê di şûna çeteyên DAIŞ’ê ceza bike şervanên wan dîl digire û wiha got: “5 şervanên me niha di destê artêşa Îraqê de ne. Hikûmeta Îraqê di şûna ku van çeteyên DAIŞ’î ceza bike û bidarizîne, şervanên YBŞ’ê ku şerê li hember DAIŞ’ê kirine, digire. YBŞ di nav şerê li dijî DAIŞ û berxwedanê de ava bû, lê îro ji hêla hikûmeta Îraqê ve wek terorîst tê binavkirin. Heta xilaskirina şervanên xwe ji destê wan, em ê her li ser piya bin, di nav çalakiyan de bin. Niha dayîkên her 5 şervanên dîlgirtî, li navenda Şengalê li ber deriyê Îstixbara Îraqê di nav çalakiyê de ne û em wek civak heta dawiyê bi wan dayîkan û berxwedana wan re ne.”

Çalakiya dayikên şervanên dîlgirtî

Hêjayî bibîrxistinê ye dayîkên 5 şervanên dîlgirtî ji ber nêzîkatiya hikûmeta Îraqê û ji bo berdana zarokên xwe, di 2’yê nîsanê de li navenda Şengalê li ber deriyê Îstîxbara Îraqê dest bi çalakiyê kirin. Dayîkan diyar dikin ku heta rizgarkirina zarokên xwe, ew dê her di nav çalakiyan de bin.