Dêrazor – Meclisa Kombûna Jinan a Zenûbiya ya Dêrazorê der barê pêşdeçûnên siyasî yên dawîn de daxuyanî da.

Endama Meclisa Kombûna Jinan a Zenûbiya ya Dêrazorê Seher El Mistefa daxuyanî xwend. Di daxuyaniyê de hat diyarkirin ku desthilata Şamê vîna gelê sûriyeyê û hêviyên wî yên ber bi guhertina demokratîk ve paşguh dike.

Her wiha di daxuyaniyê de hate destnîşankirin ku pêwîst e her hikumetek ku aramî û geşepêdanê li Sûriyê dixwaze, li ser bingeha lihevkirineke niştîmanî ya berfereh ku bi awayekî adil nûnertiya hemû pêkhateyên gelê Sûriyeyê bike, be.

Meclisê di daxuyaniya xwe de paşguhkirina rola jinan di jiyana siyasî de şermezar kir û got nûnertiya jinan a di hikumeta heyî de şeklî ye û tu rola wê ya bandorker di civakê de tune ye. Meclisê bang kir ku nûnertiya jinan di tevahî saziyên dewletê de aktîv û rasteqîn be, her wiha di hikumet, parlamenter û dadweriyê de jî aktîv be.

Her wiha meclisê banga pêkanîna diyaloga niştîmanî ya berfireh kir ku tê de tevahî aliyên Sûriyeyê beşdar bin da ku bigihîne çareseriyeke siyasî, krîz bi dawî bibe û hêviyên gelê Sûriyeyê yên azadî, edalet û demokrasiyê pêk bên.

Meclisê piştgirî da biryara Rêveberiya Xweser a redkirina biryarên desthilata Şamê. Meclisê dawiya daxuyaniyê de girêdana xwe bi xwestekên avakirina Sûriyeyeke demokratîk a hevbeş a nenavendî ve dubare kir.