AVRÎN NAVDAR

Hesekê – Bi salan berê jinên Kurd kevirê bingehîn ê yekemîn hêza leşkerî ya jinan di civaka Rojhilat de danî. Hêzeke jinan li ser çend prensîbên ku 'Jin nikarin li bendê bin kesek din wan azad bike divê ji bo azadiya xwe têbikoşin' hat avakirin. Bi 'Tabûra Şehîd Rûken' dest pê kir û piştre li gelek herêmên Bakur û Rojhilatê Sûriyeyê tabûrên jinan hatin avakirin.

Bi dirûşma "Ji bo serkeftina şoreşê di nava Yekîneyên Parastina Jin (YPJ) de xwe bi rêxistin bikin" di 4'ê Nîsana 2013'an de yekem car hêza jinan a leşkerî li Rojava fermî hat îlankirin. 4'ê Nîsanê rojbûna Rêberê Gelê Kurd Abdullah Ocalan e. YPJ jî li ser felsefeya Rêberê Gelê Kurd Abdullah Ocalan ku pêşkêşî jinan kiriye ava bûye.

Ajansa me jiyana şervanên jin ên di nava Yekîneyên Parastina Jin (YPJ) de cih digrin û bi mebesta nêzbûna salvegera wan a 12'emîn şopand.

'Felsefeya Rêber Apo ji bo me riya ronahiyê ye'

Leyla Dirpersiyê ji pêkhateya Ereb e û hebûna xwe di nava YPJ'ê de dîtiye dibêje: "Bi saya pakrewanan ax û herêmên me ji terora DAIŞ'ê hatine rizgarkirin. Armanca YPJ'ê ew e ku jinan ji desthiladarî, koletî û zihniyeta baviksalarî rizgar bike. Bi riya hêzên jinan li Bakur û Rojhilatê Sûriyeyê em hewl didin vê zihniyetê ji holê rakin. Felsefeya Rêber Apo ji bo me gelek girîng e. Em têkoşîna xwe li ser gotina Rêber Apo yê ku dibêje "Eger jin azad nebin, civak azad nabe" xurt dikin û vê rastiyê ji jinan re vedibêjin. Felsefeya Rêber Apo ji bo me "Ronahiya ku li hemberî hemû jinan rê vekiriye" û em li ser vê bingehê têdikoşin."

'Bi yekitiya xwe êrîşan têk dibin'

Leyla Dirpesiyê da zanîn ku şervanên YPJ'ê bi têkbirina DAIŞ'ê li cîhanê deng vedan û wiha got: "Şervanên YPJ'ê ji cîhanê re îsbat kirin ku jin dikarin li hemberî terorê li ber xwe bidin û wan têk bibin. YPJ ne tenê hêza jinên Kurd e, ew deriyên xwe ji hemû pêkhate, mezheb û olan re vedike. Bi taybetî jinên Ereb di nava xwe de digre ji ber ku rola wan di nava civakan de hatibû paşguhkirin û biçûkxistin. Em bi yekitiya xwe li dijî hêzên terorê yên weke DAIŞ’ê ku berê êrîşî herêmê kiribûn û êrîşên çeteyên dagirkeirya dewleta Tirk ên niha li ser Pira Qereqozaqê û Bendava Tişrînê, têdikoşin û van êrîşan pûç dikin."

'Em ê her dem di nava lêgerîna azadiyê de bin'

Di dawiya gotinên xwe de Leyla Dirpesiyê diyar kir ku ew hewl didin fikir û felsefeya Rêberê Gelê Kurd Abdullah Ocalan di nava civakê de belav bikin û wiha axivî: "Em ê felsefeya azadiyê ya Rêber Apo belav bikin û di lêgerîna azadî û mafên xwe de em ê xwe kûrtir bikin. Em ê xwe ne tenê bigihîjînin jinên Sûriyeyê, xwe bigihîjînin hemû jinên Rojhilata Navîn. Bûyerên ku li herêmên peravê yên Sûriyeyê piştî rêveberiya demkî hat îlankirin, rû dane, li dijî felsefeya me ne. Çareserî jî pêkanîna pergala neteweya demokratîk e. Divê Sûriye ya hemûyan be û peyva Ereb ji navê herêmê bê rakirin. Armanca me ew e ku em rola xwe di pêşeroja Sûriyeyê de îsbat bikin."

'Em hêza xwe ji Arîn, Avêsta, Silava û Bêrîvanan digrin'

Amara Îlan jî bal kişand ser fedakariyên şervan û têkoşerên jin ji bo pêşxistina ruhê xweparastinê bi jinan re û got: "Di salvegera 12'emîn a avakirna YPJ'ê de em hemû pakerewanên azadiyê bi rêzdarî bi bîr tînin. YPJ di berxwedana li dijî êrîşên li ser Bendava Tişrîn û Pira Qereqozaqê de dîroka destanên lehengiyê careke din zindî kir û bi wê berxwedanê bû modela parastina nasnameya resen a jinan. YPJ hêza xwe ji berxwedana Arîn Mîrkan, Avêsta Xabûr, Silava û Bêrîvanan digre. Şoreşa jinan li Bakur û Rojhilatê Sûriyeyê bû îlhama hemû jinên cîhanê. Em avakirina YPJ'ê diyarî Rêber Apo dikin. Rêber Apo, jinan ber bi xwe rêxistinkirin û parastinê ve bir û bi saya felsefeya wî em dikaribûn hêza xwe ava bikin. Rojbûna Rêber Apo jî weke ronesansa civakê û jinan dibînin. Yekbûn û hevgirtina me jî gelek girîng e, ji ber ruhê welatparêziyê di nava pêkhateyan de xurtir dikin."

'YPJ'ê rastî û cewhera jinan nîşan da'

Çavrê Efrîn jî bal kişand ser armancên ku Yekîneyên Parastina Jin hewl didin pêk bînin û wiha pê de çû: "YPJ hewl dide rola jinan di nava civakan de bi pêş bixe. Têkoşîna wan li dijî zihniyeta baviksalarî xurtir bike. Têkoşîn û berxwedana YPJ'ê di şoreşê de rastiya jinên şervan, têkoşer, pêşeng û siyasetmedar derxist holê. Bang li hemû jinan dikim ku hebûna xwe biparêzin û cewhera xwe nas bikin. YPJ'ê rastiya jinan derxist holê.” Çavrê Efrîn di dawiyê de ji jinan re got: “Tu hêz î, pêşeng î, çêker û afirîner î. Ji ber vê yekê xwe birêxistin bike û kesayeta jinan bi hêz careke din zindî bike."