Mexmûr – Li Wargeha Penaberan a Şehîd Rustem Cûdî Mexmûrê, bi boneya pîrozbahiya 4’ê Nîsanê rojbûna Rêberê Gelê Kurd Abdullah Ocalan di bin pêşengtiya Meclîsa Îştar ve şahiyek hate li dar xistin. Şahî bi tevlibûna gelê wargehê li saziya malbatên şehîdan bi deqeyek rêzgirtin destpêkir. Piştî rêzgirtinê li ser wate û girîngiya rojê Hevseroka Meclîsa Gel Fîlîz Bûdak axivî.

‘Em berhemên fikrên Rêber Apo ne’

Fîlîz Bûdak, di destpêka axaftina xwe de 4’ê Nîsanê li Rêberê Gelê Kurd Abdullah Ocalan pîroz kir û wiha axivî: “Em 4’ê Nîsanê ne tenê wek dayikbûnek, wek jinûve vejînbûna gelê Kurd û avabûna civakî demokratîk, ekolojîk û azadîxwaza jinê digrin dest. Rêber Apo di tevahiya jiyana xwe de kêlî bi kêlî ji bo gelê bindest têkoşiya. Em wek gelê Kurd berhemên fikrên Rêber Apo ne. Em wek jin, ciwan û tevahî kesên ku dixwazin li pey doza azadiyê bimeşin, ji bo pêkanîn paradîgmaya Rêber Apo têdikoşin û 4’ê Nîsanê wek felsefe û rêbaza jiyanê. Rojbûna Rêber Apo rojbûna mirovahiyê ye. Em vê rojê carek din pîroz dikin.”

Piştî axaftinê, paste hat birîn. Piştre, Koma Erbanê ya Meclîsa jinên ciwan, Koma Dengbêjî Meryemxan û Koma Stêra Zêrîn derketin li ser dikê û gel bi stranên xwe coşandin.

Bername bi gerandina govendê bi dawî bû. Wê gel heta siharê li Saziya Malbatên Şehîdan bimîne.