NEZÎHA BÛ SEÎDÎ

Tûnis – Ji sedî 84,7’ê jinên Tûnisê herî kêm rojê carek bi tundiyê re rûbirû dimînin. Li gor çalakvanên civaka sivîl jî bûyerên tundiyê li herêmên hundirîn ên Tûnisê zêdetir dibin. Tevî ku zagona 58 a parastina jinan ji tundiyê heye, bilindbûna rêjeya şîdetê gelek pirs û fikaran derdixe holê. Tundî li pey xwe bandorên neyînî li ser derûniyên jinan jî dihêle.

'Hişmendiya bavsalarî û nebûna hikûmetê tundiyê zêde dike'

Rêvebera Navenda Qurbaniyên Tundiyê ya parêzgeha El-Qasrîn û damezrînera Komeleya Tîqarê Seyîda Nasrî, derbarê komeleyê û armancên wê de agahî da. Seyîda zanîn ku ev komele ji bo parastina mafên jinan hatiye avakirin û wiha got: "Ji sala 2011'an ve, me ev komele ava kiriye. Ev komele bi yasayî têdikoşe. Armanca wê, hemû xizmet, piştgirî, alîkarî, rênîşandan û şîretan pêşkêşî jinan bike. Bi taybetî jî ji bo mexdûrên tundiyê dide. Komele bi salan têkoşiya, heta ku karîbû pêşnûmeya zagona hejmar 58 a sala 2017'an amade bike. Erêkirina vê zagonê jî gavek erênî yê ji bo welêt bû. Zagon ket meriyetê lê hê jî feraseta paşverû ya mêr di nava civakê de heye. Bi taybetî li herêmên hundirîn ên parêzgeha El-Qasrîn ev tê dîtin. Her wiha nebûna hikûmetê li wan herêman jî rê li  ber zêdebûna tundiyê vedike."

‘Ji sedî 40’ê jinan ne xwendewar in’

Seyîda Nasrî Derbarê bandorên hişmendiya mêrsalar ên li ser herêmên ku hikûmet lê tuneye de wiha axivî: "Ji ber serweriya feraseta bavsalarî li ser herêmên hundirîn yên El-Qasrîn rêjeya nexwendewariyê ya jinan ji sedî 40 zêdetir e. Her wiha li parêzgehên bakur-rojava jî ji sedî 60’î zêdetir e. Nebûna hikûmetê û ne pêkanîna zagonan di nav de zagona 58 jî, dibe sedem ku em ji parastina jinan dûrkevin û bûyerên tundiyê zêdetir bibin. Civaka sivîl rolek girîng di warê parastina jinê ya ji tundiyê de dilîze. Lê dîsa jî, ji aliyê hikûmetê ve tên tepisandin. Heta ji bo jinên ku rastî tundî û destdirêjiyê hatine xizmeta tenduristiyê ya bê pere nehatiye dayîn da ku pêdîviyên xwe pêk bînin."

Ji bo kêmkirina tundiya li herêmên hundirîn, tedbîr nayên girtin. Desteyên hevrêziyê di warê têkoşîna li dijî tundiya li ser jinan de, di asta herêmî û neteweyî de bi hevkariya civaka sivîl, rêbernameyek amade kirin. Divê rêbernameyê de rêgezên prosedurê û rêziknameya li gor Çavdêriya Netewî ya Têkoşîna li Dijî Tundiya ser jinê, hene.