Mexmûr – Li Wargeha Penaberan a Şehîd Rustem Cudî (Mexmûrê) bi boneya 4’ê Nîsanê rojbûna Rêberê Gelê Kurd Abdullah Ocalan, her sal ji aliyê Qada Perwerdê ve Mîhrîcana Çand û Werzîşê ya 4’ê Nîsanê tê lidarxistin. 17’emîn Mîhrîcana 4’ê Nîsanê ya Çand û Werzîşê ku di 18’ê Sibatê de bi turnûvaya futbolê destpê kir, bi pêşangeha hunerî, pêşbirkên werzîşî, bi şahî û pîrozbahiyan didome.

Îro jî li navenda Çand û Hunerê ya Mexmûrê pîrozbahiyek girseyî hate li dar xistin. Beriya ku şahî destpê bike hemû xwendekarên dibistanan berê xwe dan qada Navenda Çand û Hunera Mexmûrê. Xwendekarên dibistanên Seretayî, Navîn û Amedeyî bi cil û bergên Kurdî, bi meşên xwe yên leşkerî, hilgirtina al û wêneyên Rêberê Gelê Kurd Abdullah Ocalan berê xwe dan qada pîrozbahiyê. Beriya ku şahî were destpêkirin ji bo tevayî cangoriyên azadiya Kurdistanê deqeyek rêz hat girtin. Piştî rêzgirtinê, li ser giringî û wateya rojê Hevberdevka Qada Perwerde Hêlîn Kara axivî.

‘Dem dema azadiya fîzîkî ya Rêber Apo ye’

Hêlîn Kara, di destpêka axaftina xwe de 76’emîn rojbûna Rêberê Gelê Kurd Abdullah Ocalan pîroz kir û wiha axivî: “Her sal li wargehê ji aliyê Qada Perwerde ve bi boneya rojbûna Rêber Apo mîhrîcan tê lidarxistin. Di vê mîhrîcanê de ked û xebatek mezin ya mamoste û xwendekaran heye. Zarok û ciwanên wargehê rojbûna Rêber Apo rojbûna xwe dibînin. 4’ê Nîsanê xwedî wateyekî dîrokî, civakî, çandî û hişmendiyekî bîrdozî ye. Rêber Apo bi berdelên pir giran destbî têkoşînê kir û bû îfadeya herî rast a têkoşînê. Em dibînin îro fikir û felsefeya Rêber Apo hemû sînoran derbas dike, gerdûnî dibe û hemû kes daxwaza azadiya fîzîkî ya Rêber Apo dikin. Êdî dem dema azadiya fîzîkî ya Rêber Apo ye. Divê em 4’ê Nîsanê bikin roja azadiya fîzîkî ya Rêber Apo.”

Piştî axaftina vekirinê, bernameya şahiyê bi koro ya dibistana dayîkê destpê kir. Her wiha piştî koroya zarokan paste hat birîn, orkestra xwendekarên dibistana Navîn bi stranên xwe reng da şahiyê. Piştre, şahî bi pêşbirka dengbêjiyê ya di navbera dibistanên seretayî de domkir.

Di danê şevê de jî pêşbirka zanistî ya di navbera dibistanên navîn de hat kirin. Piştre, Koma govendê ya Navenda Hevî derket ser dike. Di şahiyê de dem bi dem encamên giştî pêşbirkên mîhrîcanê hatin ragihandin. Herî dawî hunermend Sherif Omerî derket ser dike û coşek mezin da şahiyê.

Her wiha roja fînalê ya mîhrîcanê sibê ye, wê şahî sibe şev jî bidome.