Navenda Nûçeyan – Yekîneyên Parastina Jin (YPJ) 12'emîn salvegera damezrandina xwe û rojbûna Rêberê Gelê Kurd Abdullah Ocalan bi merasîmekê bi dirûşmeya "Artêşa jin temînata jiyana azad e" pîroz kir. 

Yekîtiya Jinên Şoreşger ên Myanmarê bi sînevîzyona ku ji merasîmê re şand, damezrandina YPJ'ê pîroz kir. Di sînevîzyonê de yekîneyên jinan diyar kirin ku ji YPJ’ê hêz girtine û damezrandina wê silav dikin û wiha gotin: "Salvegera hevalên me yên YPJ'ê yên şoreşger pîroz be. Em şoreşgerên jin ên Hêzên Parastina Neteweyî ya Çîn a li eyaleta Çîn a Myanmarê ne. Ezmûna we ji bo me îlhamek e. Em dikarin jêhatiya jinan bibînin ku çawa dikarin di şer de bê sînor şer bikin û bibin fermandar.

'Em bi we serbilind in'

Em hêvîdar in ku di paşerojê de em bi hev re li herêmên xwe li dijî dîktatoriyê têbikoşin, mil bi mil bi we re, ji bo mafên xwe heta ku dîktatorî ji ser rûyê erdê rabe têbikoşin. Em bi we serbilind in û hurmeta xwe radigihînin. Em we pîroz dikin.”