VIYAN CIZÎR

Hesekê – Bi mebesta rojbûna Rêberê Gelê Kurd Abdullah Ocalan û 12’emîn salvegera damezrandina Yekîneyên Parastina Jinê (YPJ), duh pîrozbahiyek hat lidarxistin. Fermandara YPJ’ê Rohilat Efrîn û şervanên YPJ’ê yên beşdarî pîrozbahiyê bûn, nêrînên xwe bi ajansa me re parve kirin. Fermandara YPJ’ê Rohilat Efrîn got ku “Di serî de em vê rojê roja 4’ê Nîsanê, roja zayîna Rêber Apo li hemû gelan, li hemû jinan, li hemû mirovahiyê pîroz dikin. Di kesayeta Rêber Apo de ev roj bû roja vejinê. Êdî pirsa ku em kî ne emê çi bikin, bi zayîna Rêber Apo re mirovahî hemû pê hesiya ku êdî em dikarin pêşiya xwe bibînin.”

‘YPJ bû sedem ku jin careke din berê xwe bidin rastiya xwe’

Rohilat Efrîn diyar kir ku YPJ’ê temenê xwe 13 sal êdî aniye asteke, bi tekoşînek tijî kiriye û wiha pê de çû: “Li ser bingeha rastiya bîrdoziya Rêber Apo ya ku hişt li hemberî hemû şêwazên dagirkerî, li beramberî hemû ferasetên desthilatdariya ku tenê rengekî dibîne, çandekî, zimanekî dibîne, têkoşîna YPJ’ê derkeve holê. YPJ’ê hişt ku bi rastî hemû jin, jinên cîhanê, jinên Rojhilata Navîn, jinên enternasyonal, di Rojava de, di Bakur û Rojhilatê Sûriyeyê de hemû pêkhate, careke din berê xwe bidin rastiya xwe. Bêjin em weke jin, li hemberî hemû şêwazên feraseta mêr, li hemberî şêwazên dagirkirinê û dagirkeriyê dibêjin em têbikoşin.”

‘YPJ bû sembolek ji bo hemû jinên cîhanê’

Rohilat Efrîn destnîşan kir ku sirra têkoşîna YPJ’ê jî di hêza parastina wê de veşartî ye û wiha berdewam kir: “Ên ku em anîn vê rojê û bi rastî em kirin hêz, ên ku em bi ziman kirin, pir ziman anîn cem hev, tevî ku hemû zimanan ji hev fam nedikir jî, lê sirra vê jiyanê ew zimanê xwe parastinê bû. Di vê maneyê de em dikarin bêjin ku, YPJ bû sembolek ku hemû jinên cîhanê xwe li vê yekê bigire. Bi bingeh, bi pîvan destpê kir, li ser asta cîhanê mirov dikare bêje modela xwe qezenc kir.”

‘Em vê cejnê li mirovahiyê pîroz dikin’

Rohilat Efrîn destnîşan kir ku di Sûriyeya nû de piştî hilweşandina rejîma Baasê, bi têkoşînek hîn dijwartir re rûbirû ne û bi van gotinan dawî li axaftina xwe anî: “Ji ber wê, em bi pergalekî wisa re rûbirû ne ku tê de dengê jinê, rengê jinê tuneye. Li ser vê bingehê me bi têkoşîn û parastinê anî vê astê, ji vir û pê de jî tekoşîna me, israra me, biryara me, ji bo parastina jinan, ji bo parastina axê, wê heman tişt be. Heta, ji vê zêdetir emê bikaribin xizmeta hemû jinan, parastina gelan bikin ku li ser piya bisekinin. Di vê maneyê de em careke din vê cejnê li hemû jinan, li hemû mirovahiyê, di serî de li Rêber Apo, li şervanên ku niha li Bendava Tişrînê û Qereqozaqê, Dêr Hafirê di çeperan de liber xwe didin, pîroz dikin. Di şexsê van hevalan de ji bo şervanên ku di oxira tekoşînê de şer dikin, li wan jî em pîroz dikin. Li ser vê bingehê em dibêjin cejna hemû mirovahiyê pîroz be.”

‘YPJ çavkaniya xwe ji îradeya jinan digre’

Şervana YPJ’ê ya Suryanî Horo Nûr jî salvegera avakirina YPJ’ê li tevahî şervanên YPJ’ê pîroz kir û wiha got: “Em destpêkê keda ku tevahî şervanên YPJ dane û di oxira avakirina wê de jiyana xwe ji dest dane, bi minetdarî silav dikin. Me her tim hewl da em bi hev re wek pêkhateyên Bakur û Rojhilatê Sûriyeyê bibin dengê jinan û parastina doza jinê bikin.” Horo Nûr diyar kir ku ewê her tim yekîtiya jinan biparêzin da ku Sûriyeke pir reng, di nava xwe de mafên hemû pêkhateyan diparêze, ava bikin. Horo Nûr di berdewama axaftina xwe de bal kişand ser tengasiyên ku jin pê re rû bi bû mane, yên ji ber ku xwest bikaribe hêzeke xweser ava bike. Horo Nûr wiha got: “Têkoşîna jinan li Bakur û Rojihilatê Sûriyeyê, nîşan da ku karîbû hêzeke wek DAÎŞ’ê ku bibû bela serê mirovahiyê têk bibe, ev çavkaniya xwe ji îradeya jinan digre.”

‘Em vegeriyan cewhera xwe’

Şervana Ereb Şîraz Çekdar jî salvegera 12’an a avakirina YPJ’ê û rojbûna Rêberê Gelê Kurd Abdullah Ocalan pîroz kir û wiha got: “Avakirina YPJ’ê ya di 4 Nîsanê de, xwedî wateyek dîrokî ye. Ji ber ku YPJ bi saya fikr û ramanên Rêber Apo karibû xwe bighîne vê astê, her wiha me jinan di nav YPJ’ê de rastiya xwe nas kir. Em vegeriyan cewhera xwe. Ji ber wê, em rojbûna Rêber Apo wek rojbûna xwe tevahî jinan dibînin.”

Li Bakur û Rojhilatê Sûriyeyê mînakek yekîtiya gelan û jinan derket holê’

Şîraz Çekdar anî ziman ku wan bi naskirina îdeolojiya Ocalan zincîrên koletiyê şikandine û li beramberî hêzên ku hebûna jinan nas nakin, şerekî bê hempa meşandine. Şîraz Çekdar wiha got: “Berxwedana ku niha li bendava Tişrînê jî tê meşandin, nûmeneya vê berxwedanê bû. Ez bang li hemû jinan dikim ku yekîtiya xwe xurt bikin. Li Bakur û Rojhilatê Sûriyeyê mînakek yekîtiya gelan û jinan derket holê. Emê bi yekîtiya xwe Sûriyeyek demokratîk û azad ava bikin û li beramberî perçebûnê şer bikin.”