Kobanê – Di bin diruşmeya “4’ê Nîsanê vejîna azadiya jin û gelan e” bi hezaran ji şêniyên bajarê Kobanê bi pêkhateyên Kurd û Ereb roja rojbûna rêberê gelê Kurd Abdullah Ocalan a 76’an pîrozkirin.

Di destpêkê de bi sedan maşîneyên bi poster û wêneyên Ocalan xemilandî, li qada Jina Azad kombûn û bi berzkirina diruşmên ‘bê serok jiyan nabe’ karwanê maşîneyan ber bi gundê Elpelûrê yê li Rojavayê Kobanê ve çûn. Li gundê Elpelûrê ku gel li mala Abdullah Ocalan li hev civiyan, dirûşmên ‘Jin, Jiyan, Azadî’ û ‘Bijî serok Apo’ hatin berzkirin ku pişt re vegeriyan qada şahiyê.

Şahiya ku li qada Şehîd Egîd hat birêxistinkirin, bi hezaran gel, jin, ciwan û zarok têde amedebûn.

Piştî deqeyek rêzgirtin, perwpektîfên Rêberê Gelê Kurd Abdullah Ocalan hat guhdarkirin.

Paşê rêveberiya Kongreya Star Şervîn Hesen axivî.

‘Dilê me bi vîna Rêber Apo bi azadiyê lê dide’

Şervîn Hesen wiha got: “Rêber Apo di demeke ku gelê Kurd nikarbû serê xwe rake û hatibû tunekirin, jidayîk bû. Lewra jî em dibêjin 4’ê Nîsanê roja vejîna gel û mirovahiyê ye ku em dibînin îro bi hezaran gel û pêkhate li derdora wî kom dibin. Piştî mizgîniya ku me ji Rêber Apo girt, em êdî bawer in ku emê di demeke nêz de wî fîzîkî di nava xwe de bibînin. Bi taybet jî weke jin ku me pêşengiya têkoşîn û felsefeya Rêber Apo kir, di her warî de em bûn sembol û emê vê yekê dewam bikin. Ger em gihîştin van rojan û dilê me bi azadiyê lê dide, ev jî xwe dispêre vîna ku serok di me de avakir. Ji bo vê jî di rojbûna wî ya 76’an de em doza xwe ya avakirina jiyaneke azad li gel Rêber Apo nû dikin.”

Paşê endama kordînesyona Kongreya Star Peyman Elûş peyama Yekîneyên Parastina Jin (YPJ) a di salvegera wan ya 12’emîn de xwend. YPJ’ê di daxuyaniya xwe de teqez kir ku ewê hemû jinên cîhanê biparêzin û têkoşîna avakirina Sûriyeke demokratîk û azad bidin meşandin.

Herî dawî jî bernameya hûnerî bi hunermend Silava Bozo, Sîpan Xelat, Ehlam Ebdî, Şêrîn Ararat, Xelîl Can, Aycan Kobanê û koma şehîd Esmer a govendê birêve çû.

Şahî bi gerandina govendê, berzkirina siloganan û tilîliyan bi dawî bû.