Navenda Nûçeyan – Cenazeyê endamê Desteya Hevserokatiyê ya Partiya Yekitiya Demokratîk (PYD) Salih Muslim ku li Hewlêrê jiyana xwe ji dest da, li bajarê wî Kobanê hat definkirin. Di merasîma ku bi deh hezaran kes û siyasetmedarên navdar ên Kurd beşdar bûn de Salih Muslim bîr anîn, di axaftinan de peyama domandina têkoşîna Şoreşa Rojava û azadiya gelê Kurd hat dayîn.

Merasîma cenaze bi beşdariya deh hezaran hat lidarxistin

Ji bo endamê Desteya Serokatiya PYD'ê Salih Muslim ku di 11'ê Adarê de ji ber nexweşiyê jiyana xwe ji dest da, li bajarî wî Kobanê, li Pakrewangeha Şehîd Dîcle, merasîma cenaze hat lidarxistin.

Di merasîmê de ji derveyî bi deh hezaran mirovan, gelek heyet ji Tirkiye, Kurdistan û Herêma Başûrê Kurdistanê beşdar bûn. Piştî deqeyek rêzgirtinê, nameya Rêberê Gelê Kurd Abdullah Ocalan a piştî wefata Salih Muslim şandibû hat xwendin.

Leyla Zana: Riya hêviyê vekir

Siyasetmedara Kurd Leyla Zana bi van gotinan xatir ji Salih Muslim xwest:

“Riya hêviyê ya ku Salih Muslim vekiriye dê riya me ronî bike. Em şehîdên ku duh hatin oxirkirin bi rêz û hurmet bîr tînin. Em bi bedelên mezin gihîştin vê astê. Em di demeke wisa de ne ku yan em ê azad bijîn an jî azad bijîn. Serok Apo li ser yekîtiya demokratîk diaxive, ji ber vê yekê divê her kes berpirsiyariya xwe bi cih bîne. Em ê hêviyên xwe mezintir bikin û ji bo jiyana azad bêhtir têbikoşin.”

Eyşê Efendî: Em ê têkoşînê bidomînin

Hevjîna Salih Muslim Eyşê Efendî di axaftina xwe de bal kişand ser biryardariya domandina têkoşînê û got: “Me gelek caran karwanên şehîdan oxir kirin. Îro em Bavê Welat oxir dikin. Lê em bi navê Kobaniyan û Rojava tevahî Serok Apo silav dikin. Hevaltiyek li ser felsefeyek kûr û rast di navbera Bavê Salih û Rêber Apo de hebû. Ey Serok Apo me ew nameya te ya bi nirx girt. Ew ne tenê ji bo Bavê Welat, ji bo şehîdan û vî gelî tevahî ye. Em gelê her çar perçeyên Kurdistanê li her derê yek in. Em ê bi hev re têkoşîna xwe bidomînin. Salih Muslim di hizûra Şehîd Şervan de soza xwe nû dikir. Ez jî di hizûra Salih Muslim de soza xwe nû dikim ku ez ê ji nû ve dest pê bikim. Li çar perçeyên Kurdistanê ez ê têkoşînê bidomînim.” Eyşe Efendî axaftina xwe bi dirûşma, “Bijî Serok Apo” û “Şehîd namirin” bi dawî kir.

Li kêleka Şervan Muslim hat definkirin

Piştî axaftinan, peyamên ji bo merasîma cenaze hatin xwendin. Piştî merasîmê, cenazeyê Salih Muslim li kêleka kurê wî Şervan Muslim li Goristana Şehîd Dîcle hate definkirin.