سیلڤا ئیبراهیم

 

کۆبانێ- دانیشتوانی ئاوارەی گەمارۆدراوی کۆبانێ کە لە ژێر هێرشی چەتەکانی هەتەشە داوای کۆتاییهێنان بە هێرشەکان و گەڕانەوەی پارێزراو بۆ گوندەکانیان و هەڵگرتنی گەمارۆکە دەکەن، نەک گەیاندنی هاوکارییە مرۆییەکان.

 

لەگەڵ پەرەسەندنی سەربازیی ئەم دواییەی چەتەکانی هەتەشە لە سەرانسەری ناوچە بەرفراوانەکانی باکوور و ڕۆژهەڵاتی سووریا، دانیشتووان ناچاربوون ماڵەکانیان بەجێبهێڵن، بەتایبەتی ئەوانەی لە ناوچەکانی پێسەوەی جەنگدان، زۆربەیان پەنایان بۆ کۆبانێ بردووە، کە ئێستا لە خوێندنگە و نەخۆشخانەکاندا پەنایان گرتووە، ئەمەش لەنێو گەمارۆیەکی خنکێنەردا کە لەلایەن چەتەکانەوە سەپێندراوە.

 

نەتەوە یەکگرتووەکان ٢٦ی کانوونی دووەم ٢٤ بارهەڵگر خۆراکی بۆ شارەکە نارد، بەڵام دانیشتووان ئەمە بە چارەسەرێکی کاتی دەزانن کە پێداویستییەکانیان دابین ناکات و پێیان وایە ئەو هاوکارییانە تەنها داپۆشینی گەمارۆی بەردەوامە.

 

ئاژانسەکەمان دۆخی نالەباری کۆچبەرانی لە خوێندنگەکاندا دۆکیۆمێنت کرد و لەگەڵ چەند ژنێک کۆبووەوە، لەوانە گوڵی حەمی، خەڵکی گوندی بەرخ بۆتان لە باشووری کۆبانێ کە شوێنێکی گەرم ناسراوە، وتی: ئێمە لە گوندەکەمان کۆچمان کرد، ئاژەڵەکانمان بەبێ خواردن و ئاو بەجێهێشت، لەناو بەفر و باراندا، پەیوەندیمان لەگەڵ کەسوکارەکانمان لەدەستداوە و نازانین لە ژیاندان یان مردوون، تەنها لەگەڵ نەوە گەنجەکانمدا ڕۆیشتین.

 

لە شەڕی داعشدا دوو کوڕی لەدەستدا، ئێستا خۆی و هاوژینەکەی بەرپرسیارن لە نەوە بێ باوکەکان لە ژێر بارودۆخی سەختی کۆچکردن و شەڕدا، هەروەها کوڕەکانم لە هەسەدە بە ناوی هەموو جیهانەوە شەڕی داعشیان کرد، ئێستاش هەموو جیهان قازانج لە خوێنی کوڕەکانمان و گەلەکەمان دەکات، داعشیان بۆ ئێمە ناردووەتەوە، بەڵام بە ناوێکی جیاواز.

 

ڕەخنەی تووندی لە نەتەوە یەکگرتووەکان بە گرت، وتی: پێویستمان بە سەبەتەی خۆراک نییە، ئەگەر ئەوان گرنگییان پێبدباینا، بێدەنگ نەدەبووین بەرامبەر بە کارەساتەکەمان و ئەو گەمارۆیەی کە لە نێوان بارودۆخی سەختی زستاندا بەسەرماندا سەپێندرا، ئەگەر بەڕاستی گرنگییان بە مافەکانی مرۆڤ بدابایە، ئەوا هێزێک بۆ چاکە و وەستاندنی شەڕەکە لە جیاتی سووتەمەنی بڵێسەی ئاگرەکە دەبوون، چونکە ئەحمەد شەرع”جۆلانی”بەتەنها بەرپرسیار نییە لەو هێرشانە، بەڵکو هەموو وڵاتان تێوەگلاون و تەنانەت ئەو توخمانەی هێرش دەکەنە سەرمان، نەک هەر سووریین بەڵکو لە هەموو نەتەوەکانن.

 

لە کۆتاییدا بانگەوازی بۆ هەموو کوردانی چوار پارچەی کوردستان کرد، وتی: سنوورەکان ببەزێنن و گوێ لە بانگەوازەکەمان بگرن، لەم تاقیکردنەوەدا لەگەڵمان بوەستن، چیتر بانگەوازی کۆمەڵگەی نێودەوڵەتی ناکەین، کورد جگە لە کورد کەسی نییە، یەکگرتوویی کورد لەم هەلومەرجە سەختەدا پێویستییەکی بەپەلەیە بۆ ئەوەی کۆمەڵگەکەمان لە هەڕەشەی لەناوچوون ڕزگار بکەین.

 

”کۆمەڵکوژی دووبارە بووەوە”

هاجیرە بەشیر، خەڵکی هەمان گوندە، وتی: ئەمە دووەمجارە لە گوندەکەمان کۆچبکەین، یەکەمجار لە کاتی هێرشی داعش بۆ سەر کۆبانێ بوو لە ساڵی ٢٠١٤ هەروەها گوندەکە شایەتحاڵی کۆمەڵکوژییەک بوو کە تێیدا ٣٥ هاوڵاتی مەدەنی کوژران، هەندێک خێزانیش زیاتر لە پێنج ئەندامیان لەدەستدا، ئێستا ئێمە ڕووبەڕووی دووبارەبوونەوەی ئەو کۆمەڵکوژییە دەبینەوە ئەگەر ئامێری جەنگ نەوەستێت، ئێمە لە ڕاستیەکەدا دەژین، کارەساتبارە دوای ئەوەی لە ناوەڕاستی زستان و سەرمای سەختدا ماڵەکانمان بەجێهێشتووە، هیچ هەواڵێکمان نییە لەبارەی کەسوکارەکانمانەوە کە بەهۆی پچڕانی ئینتەرنێتەوە لە گوندەکەدا ماونەتەوە، داوای کۆتاییهێنان بە هێرشەکان و گەڕانەوەی پارێزراوی بۆ گوندەکە دەکەم.

 

"پێویستمان بە یارمەتی نییە"

ڕابیعە شێخ محەمەد ئاماژەی بەوەشکرد، هێرشەکانی سەر گوندەکە ناچاریان کردووە ماڵەکەمان بەجێبهێڵین، هەروەها بەهۆی ئەو منداڵە بچووکانە ڕۆیشتین کە بە دەنگی تۆپبارانەکە ترساون، ئێمە ئەوەندە پێویستمان بە هاوکاری نییە، دوو ئەوەندە پێویستمان بە هەڵگرتنی گەمارۆکە هەیە، چالاکییە بازرگانییەکان دەستپێبکەنەوە، ئاو و کارەبا بگەڕێندرێنەوە و شەڕەکە بوەستێت، هەموو شتێکمان هەیە کە پێویستمانە لە ماڵەکەمان و گوندەکەماندا، پێویستمان بە هاوکاری نییە، ئەگەر گرنگی بە خەڵکی مەدەنی دەدەن، پێویستە دڵنیابن لە گەڕانەوەمان بە پارێزراوی.

 

جەختیشی لەوە کردەوە کە ئاوارەبوونی دیکە قبوڵ ناکەن، هەروەها ئێمە واز لە کۆبانێ ناهێنین، ئەم شارە دەپارێزین، چونکە نوێنەرایەتی ناسنامەی ئێمە و مێژووی دەوڵەمەندی ئێمە دەکات، ڕێگریش دەکەین کە چەتەکان بچنە ناویەوە، چونکە بێزار بووین لە کۆچکردن.