ناوەندی هەواڵ

 

فەرماندەیی گشتی یەکینەکانی پاراستنی ژنان یەپەژە سەبارەت بە بێڕێزیکردنی گرووپە چەتەکانی حکومەتی کاتیی سووریا بە تەرمی ئەندامێکی هێزەکانی ئاسایشی ناوخۆی شێخ مەقسوود، ڕاگەیاندراوێکی بڵاوکردەوە.

 

لەم ڕاگەیاندراوەدا هاتووە: هێزەکانی پاراستنی ژن لە دژی هزری جیهادی چەتەکانی هەتەشە و دەوڵەتی داگیرکەری تورک لە حەلەب بەرگرییەکی بێوێنە دەکەن.

 

یەپەژە ئاماژەی بەوە کردووە کە لە شۆڕشی باکوور و ڕۆژهەڵاتی سووریادا، ژنانی ئازادیخواز بوونەتە ترس بۆ دڵی دوژمن و لە کولتووری ناوچەکەدا کەرامەتی ژن، کەرامەتی گەلە، بۆیە چەتە داگیرکەرەکان دەیانەوێت بەم ڕەفتارە نائەخلاقییانە هیوای گەل بشکێنن، بەڵام ژنان و گەلەکەمان لەم ڕێبازە هۆڤانەیە ناترسن و دەبنە هێزی بونیادنانی ئازادی.

 

لەم پەیامەدا یەپەژە جەختی کردەوە کە هەرگیز لە بەرامبەر ئەم هزرەدا هەنگاو بەرەو دواوە نانێن و پاشەکشە ناکەن، یادی تێکۆشەرانی وەک بارین کۆبانی و ئامارا ڕێناسیان کردەوە و وتیان: وەک یەپەژە خۆمان بە بەرپرسیار دەزانین لە پاراستنی هەموو ژنانی سووریا و جیهان.