ناوەندی هەواڵ

 

ڕێکخراوی مافی مرۆڤی هەرانا سەبارەت بە پشتگوێ خستنی مافی ژیان و گیان لەدەستدانی ژنێکی زیندانی لە زیندانەکانی ئێران و درێژەی سزاکان و پێشێلکارییەکانی پەیوەست بە باڵاپۆشی زۆرەملێ ڕاپۆرتی بڵاو کردەوەو تێیدا هاتووە: ژنێکی زیندانیی تەمەن ٣٧ ساڵ بە ناوی تۆکتەم ڕەمەزانی لە بەندی دووی زیندانی وەکیلئانادی مەشهەد گیانی لەدەستدا، گیانلەدەستدانی ئەم زیندانییە بەهۆی تەقینی زراو و سستیی بەرپرسانی زیندان لە ڕەوانەکردنی بۆ نەخۆشخانە بووە، سەرەڕای ئەوەی بۆ ماوەی چوار ڕۆژ بەدەست ئازارێکی زۆرەوە دەیناڵاند و بەردەوام داوای چارەسەری پزیشکیی کردووە.

 

هاوکات لەیلا موعەلەمی، ژنێکی دانیشتووی مەشهەد، لەلایەن دادگای شۆڕشی ئەو شارەوە سزای ١٠ ساڵ زیندانیکردنی بەسەردا سەپێندراوە، سەپاندنی ئەم سزایە پەیوەندی بە ناردنی پەیامی دەنگی و زانیاری بۆ میدیایەکی دەرەوەی وڵات لە سەردەمی جەنگدا هەبووە، ناوبراو لە ٢٨ـی ئایاری ئەمساڵدا لەلایەن هێزەکانی ئیتلاعات دەستبەسەر کرابوو.

 

لە لایەکی دیکەشەوە، پێنج شوێنی کار لە شارەکانی گەناوە، خومەین، کرمان و قاینات بە بیانووی پەیڕەونەکردنی باڵاپۆشیی زۆرەملێ لەلایەن کارمەندان و کڕیارانەوە لەلایەن هێزە ئەمنییەکانەوە داخران، جێی ئاماژەیە لە سێ مانگی ڕابردوودا بە دەیان کافێ فەرمانی داخرانیان بۆ دەرچووە.