ناوەندی هەواڵ

 

دۆسیەی دیارنەمانی گوڵستان دۆکۆ، خوندکاری زانکۆ کە لە سەرەتای ساڵی ٢٠٢٠ـەوە تا ئێستا بە نادیاری ماوەتەوە، لەگەڵ فراوانبوونەوەی بازنەی لێکۆڵینەوەکان کە لەلایەن دەسەڵاتدارانی تورکیاوە بەڕێوە دەچن، سەرەداوی نوێ دەردەکەوێت.

 

بازنەی لێکۆڵینەوەکان لە دۆسیەی دیارنەمانی خوێندکاری زانکۆ گوڵستان دۆکۆ فراوانتر بوو، دوای ئەوەی دەسەڵاتدارانی تورکیا هەڵمەتێکی پشکنینی هاوکاتیان لە چەند پارێزگایەکدا ئەنجام دا، کە بووە هۆی دەستبەسەرکردنی ١٥ کەس بە گومانی تێوەگلانیان لە تێکدانی بەڵگە و داتای ئەلیکترۆنی پەیوەندیدار بە دۆسییەکەوە، کە هێشتا لە سەرەتای ساڵی ٢٠٢٠ـەوە تا ئێستا لە کاتی دیارنەمانی گوڵستان دۆکۆوە بووەتە جێی سەرنجی ڕای گشتی.

 

وەک لە ناوەندی هەواڵەوە ئاماژەی پێ کراوە، پرۆسەی دەستبەسەرکردنەکە لەسەر بنەمای ڕێنمایییەکانی هەردوو دادمەزراوەی گشتی لە ئەرزڕوم و تونجەلی بووە، کە تێیدا هێزە ئەمنییەکان لە بەربەیانی رۆژی سێشەممەی ڕابردوودا هەڵمەتی پشکنینیان لە پارێزگاکانی ئیلازیغ، مڵاتیە، ئەنقەرا، ئیستەنبوڵ و دێرسیم ئەنجام دا و ١٥ کەسیان لە چوارچێوەی لێکۆڵینەوەی بەڕێوەچوودا دەستبەسەر کرد.

 

لەناو لیستی دەستبەسەرکراوەکاندا سێ پزیشک و پەرستارێک، فەرمانبەرێکی بەشی تەکنۆلۆژیای زانیاری، پێنج فەرمانبەری تۆمارکردنی داتا، لەگەڵ هاندان سۆنال، هاوژینی تونجای سۆنال، والی پێشووی تونجلی خاوەنی کۆمپانیایەکی تایبەتمەند بە تەکنۆلۆژیای زانیاری کە گومانی تێوەگلانی دەکرێت لە دەستوەردان لە مۆبایلی گوڵستان دۆکۆ، هەروەھا بازرگانێک و دوو پاسەوانی گوند بوون.

 

زانیارییە سەرەتاییەکان ئاماژەیان بەوە کرد، کە دەستبەسەرکراوەکان لێکۆڵینەوەیان لەگەڵدا دەکرێت بە گومانی ئەنجامدانی کارێک کە کاریگەری لەسەر بەڵگە و داتای ئەلیکترۆنی پەیوەندیدار بە دۆسیەی بێسەروشوێنبوونی گوڵستان دۆکۆ هەبێت، لە چوارچێوەی ئەو ڕێڕەوە دادوەرییەی کە هێشتا بەردەوامە بۆ ئاشکراکردنی ڕاستییەکانی دۆسیەکە.

 

ئەم پێکهاتانە لەکاتێکدا دێن کە چەند مانگێک لەمەوبەر و لە نیسانی ٢٠٢٦ـدا ١٢ کەس دەستبەسەر و گیرابوون، لەوانە تونجای سۆنالی، والی پێشووی تونجەلی و تورکای سۆنالی کوڕی، لە هەنگاوێکدا کە لەو کاتەدا بە گۆڕانکارییەکی دیار لە ڕێڕەوی لێکۆڵینەوەکان هەژمار کرابوو.

 

پاشخانی دۆسیەکە

دۆسیەکە دەگەڕێتەوە بۆ پێنجی کانوونی دووەمی ٢٠٢٠، کاتێک گوڵستان دۆکۆ، کە قوتابیی قۆناغی دووەمی بەشی گەشەپێدانی منداڵ بوو لە زانکۆی مونزیر، دوای جێهێشتنی بەشەناوخۆییەکەی کە تێیدا نیشتەجێ بوو لە شاری دێرسیم، هەواڵەکانی پچڕان و لەو ڕۆژەوە بێسەروشوێنە.

 

ڕاستەوخۆ دوای بێسەروشوێنبوونی، خێزانەکەی لە شاری ئامەدەوە ڕوویان لە دێرسیم کرد و هێزە ئەمنییەکانیان ئاگادار کردەوە، بەمەش پرۆگەمی گەڕان و لێکۆڵینەوەی فراوان دەستی پێ کرد کە چەندین ناوچەی جیاوازی گرتەوە.

 

لێکۆڵینەوەکان دەرخەری ئەوە بوون کە دوایین نیشانەی مۆبایلی گوڵستان دۆکۆ لەسەر پردی ساری سالتوک کە دەڕوانێتە دەریاچەی بەنداوی ئۆزون چاییر تۆمار کراوە، ئەمەش گروپەکانی ڕزگارکردنی ناچار کرد پرۆسەی گەڕانی چڕ لەناو دەریاچەی بەنداوەکەدا ئەنجام بدەن، بەڵام هیچ شوێنەوارێکی قوتابییە بێسەروشوێنکراوەکەی تێدا نەدۆزرایەوە.

 

سەرەڕای ڕاگرتنی پرۆسەی گەڕانی فەرمی لە تشرینی یەکەمی ٢٠٢٢ـدا دوای ماندووبوونی هەوڵە مەیدانییەکان، بەڵام خێزانی گوڵستان دۆکۆ بەردەوام بوون لە جووڵە یاسایی و ڕاگەیاندنەکانیان بۆ داواکردنی ئاشکراکردنی چارەنووسی کچەکەیان و لێپرسینەوە لە بەرپرسانی بێسەروشوێنبوونی.

 

لە کانوونی دووەمی ٢٠٢٤ـدا، خێزانەکە لە ڕێگەی گروپی بەرگرییەوە، داواکارییەکیان پێشکەش بە دادسەرای گشتی کرد و تێیدا داوای دەستبەسەرکردنی تۆمەتباری سەرەکی زاینال ئاباراکۆڤیان کرد، کە پێشتر بە مەرجی چاودێری دادوەری ئازاد کراببوو، هەروەھا داوایان کرد ئینجین یوجەر بخرێتە ناو لیستی گوملێکراوانەوە، دوای ئەوەی لە کارەکەی لە دەزگای ئەمنیدا دوور خرابووەوە.

 

هەروەھا خێزانەکە داوایەکی یاساییان دژی تونجای سۆنالی، والی پێشووی تونجەلی تۆمار کرد، بە تۆمەتی خراپ بەکارهێنانی دەسەڵات، لەسەر بنەمای ئەو بانگەشانەی کە ئاماژە بە زانیاری دەدەن دەربارەی پرۆسەی قاچاخچیەتی بە تۆمەتباری سەرەکی بۆ دەرەوەی وڵات.

 

لێکۆڵینەوەکان هێشتا بەردەوامن، لەناو داواکاری بەردەوامی خێزانی گوڵستان دۆکۆ و ڕێکخراوە دادپەروەرییەکان بۆ ئاشکراکردنی ڕاستی تەواو دەربارەی بێسەروشوێنبوونی، دیاریکردنی بەرپرسانی هەر جۆرە دەستکارییەکی ئەگەریی بەڵگەکان یان پەکخستنی ڕێڕەوی دادپەروەری.