ئاگرین حسێنی

 

سەقز- شۆڕشی "ژن، ژیان، ئازادی" بۆ بەرپرسانی سیستم لە ڕاستیدا هەمان ئەو ڕۆژە چارەنووسسازەیە کە بەهۆی هاتن و بڵاوبوونەوەیەوە لێی دەترسان، لەبەرئەوەی ژنان تاکە گروپێکن کە بوونەتە هۆی داڕمان و شکستی خەونە کۆلۆنیالیستەکانی سەرکردەکانی سیستم، هەر لەبەر ئەم هۆکارەش ​​ژنان لە ئێران بۆ بەرەبەیانی حەقیقەتی "ژن، ژیان، ئازادی" بەردەوام لەلایەن سیستمەوە هێرشیان دەکرێتەسەر، تۆمەتبار دەکرێن بەوەی کە گروپێکی وێرانکەر و ئاژاوەگێڕ و یاخیبوون، بەم شێوەیە لە سەدەی ٢١دا ژنان و گەلان لە ئێران لە سەرەتاییترین مافە سروشتییەکانیان بێبەش دەکرێن و ڕژێمی ئیسلامی بە پەتی سێدارە شەپۆلێکی ترس و تیرۆر لە مێشکی خەڵکی کۆمەڵگەدا دەنێرێت.

 

هەر لەو پێوەندییەدا کچانی سەقز بە هەڵگرتنی دروشمی "ژن، ژیان، ئازادی" بەڵێنیان نوێ دەکەنەوە، بەهارە تەمەن ٣٧ ساڵە و خێزاندار لەم ڕووەوە دەڵێت: ئەم شۆڕشە تاکە بزووتنەوە بوو کە دەنگی ئێمەی ژنانی تێدا بیسترا و دەنگدانەوەی "ژن، ژیان، ئازادی" گوێی هەموو جیهانی هەژاند.

 

بەهارە لە درێژەی قسەکانیدا دەڵێت: لە کۆتاییدا شۆڕشی ژنان عەقڵییەتی ترسناک و ژنکوژی سیستمەکەی پاڵنا بۆ لێواری کۆتایی و لە ئەنجامدا عەقڵیەت و ئایدۆلۆژیای سیستمەکە بەرەو تاڵاوێک بردن. کە ژنانی بۆ ماوەی ٤٣ ساڵ لە دیلدا هێشتبووەوە، عەقڵیەتی پۆپۆلیستی و خۆسەپێنانەی ئەو سیستمە، ڕزگارکردنی ژنان لە سیستمی ستەمکارانەی ئێران بە بێباکانە و بێ ترسانە بە مردنێکی شەرمەزارکەر بۆ دەسەڵات و دەسەڵاتی پیاوسالاری خۆی دەزانێت.

 

واتە ڕزگارکردنی ژنان لە ستەمکاری و کۆیلایەتی ڕوودانی بوومەلەرزەیەکی ترسناکە بە قەبارەیەکی زۆر بەهێزەوە کە پاش لەرزۆکەکانی ڕۆژانە دامودەزگاکانی سیستمەکە دەخەنە خوارەوە تا مردن، ئازادی ژن لە عەقڵیەتی پیاوسالاری سیستمدا یەکسانە بە مردنی دڵنیای هەموو سیستمەکە، وە ئەم شۆڕشە ڕوودان و تەقینەوەی شۆڕشی دیموکراسی و ئازادی و بەڵێنی بنیادنانی نەتەوەیەکی دیموکراتیک لە چوارچێوەی ئێران دایە.