ناوەندی هەواڵ

 

 لە یەمەن، نیگەرانییە مرۆییەکان سەبارەت بە کارەساتێکی تەندروستی گەشە دەکات بەهۆی تێکچوونی توندی سیستەمی تەندروستی و نەبوونی پاکوخاوێنی سەرەتایی لە کەمپەکانی ئاوارەکانی ناوخۆدا. ئەم دۆخە لەگەڵ نەبوونی دەستێوەردانی بەپەلەی نێودەوڵەتی، هەڕەشە لە بڵاوبوونەوەی خێرای پەتا و نەخۆشییە کوشندەکان دەکات.

 

ڕێکخراوی تەندروستی جیهانی هۆشداری دەدات لە حاڵەتی گومانی تووشبوون بە نەخۆشی کۆلێرا

ڕێکخراوی تەندروستی جیهانی  ڕایگەیاند، ئاگادارییان لەبارەی گومانلێکراوانی تووشبوون بە نەخۆشی کۆلێرا لە دوو کەمپی ئاوارە ناوخۆییەکانی شاری عەدەن پێگەیشتووە. ڕێکخراوی تەندروستی جیهانی ڕایگەیاندووە کە وەزارەتی تەندروستی گشتی و دانیشتووان تیمەکانی وەڵامدانەوەی خێرای کۆکردۆتەوە بۆ چاودێریکردن.

 

بەپێی ئامارەکانی ڕێکخراوی تەندروستی جیهانی، ژمارەی گومانلێکراوەکانی تووشبوون بە نەخۆشی کۆلێرا گەیشتووەتە حەوت هەزار و ٧٨٤ کەس. ئەو خێزانانەی کە بەم دواییە لە کەناری ڕۆژئاوا ئاوارە بوون، ڕووبەڕووی بارودۆخێکی سەختی تەندروستی و ژیان بوونەتەوە کە مەترسی بڵاوبوونەوەی نەخۆشی زیاد دەکات.

 

بارودۆخی نالەباری ئاوارەکان و فشارەکانی سەر کەرتەکە

ڕێکخراوەکە سەرنجی بۆ تێکچوونی ڕەوشی مرۆیی ئەو پەنابەرە نوێیانەی کەناری ڕۆژئاوا ڕاکێشاوە و ئاماژەی بەوەدا کە لەسەدا ٤٠ ی ئەو پەنابەرانە بۆ ئاوی خواردنەوە پشت بە ئاوی سەرزەوی یان بیرە کراوەکان دەبەستن. هەروەها ڕێکخراوەکە ئاماژەی بەوە کردووە کە نزیکەی یەک لەسەر سێیان دەستیان بە ئاودەستی سەلامەت و داخراو ناگات.

 

ڕێکخراوەکە بڵاویکردەوە، لێشاوی برینداران بەهۆی بەردەوامی شەڕەکانەوە بارگرانییەکی زۆری خستۆتە سەر کەرتی تەندروستی و ڕایگەیاند: "لە ئەنجامدا خزمەتگوزاری تەندروستی دایکان و منداڵان و خزمەتگوزاری فریاگوزاری منداڵبوون لە دوو نەخۆشخانەی مەریب و ڕاس ئەلعەرە ڕاگیراون، ئەمەش لەبەر ئەوەیە کە ژوورەکانی نەشتەرگەری و کارمەندانی پزیشکی سەرقاڵی چارەسەرکردنی بریندارەکانن و گواستنەوەی ئەو نەخۆشانەی کە ماونەتەوە بۆ سەنتەرە جێگرەوەکانی نزیک".

 

نەبوونی ئاسانکاری و مەترسی تووشبوون بە نەخۆشیەکانی تر

هەروەها ڕێکخراوەکە ئاماژەی بەوە کردووە کە لە شارەکانی مەریب، تائیز، ئەددالی و عەدەن کەمی ئیمکانات هەیە. ڕێکخراوەکە ڕایگەیاندووە کە پێش ململانێی ئەم دواییە تەنها نزیکەی لەسەدا ٦٠ی دامەزراوەکان بە توانای تەواو کاردەکەن و ئێستا ئەم زانیاریانە پشتڕاست دەکرێنەوە.

 

ڕێکخراوەکە جەختی لەوە کردووەتەوە کە ئاوارەبوون بووەتە هۆکارێکی سەرەکی بۆ زیادبوونی پێداویستییە تەندروستییەکان، ئاماژەی بەوەشکردووە، ئاوارەبوون زۆرجار دووبارە دەبێتەوە و کورتخایەن دەبێت. دوو لەسەر سێی ئەو خێزانانەی کە لە ژێر میکانیزمی وەڵامدانەوەی خێرادا تۆمارکراون، لە سنووری شارەکانی خۆیان ئاوارە بوون. لە کاتێکدا ناوچە جێناکۆکەکان وەک ئەلمەعفەر و جەبەل حەبەشی لە تەعز سەرچاوە و شوێنی سەرەکین، بەڵام ململانێکان ڕێگایەکی لاوەکی و درێژتریش پەیڕەو دەکەن.

 

ڕێکخراوەکە بڵاویکردەوە، ئەو کەسانەی لە کەناراوەکانی حودەیدە ئاوارە بوون، بۆ شارەکانی عەدەن، ئەبیان، لاهج، حەدرەمووت و ئەلمەهرا بڵاوبوونەتەوە. هەروەها ڕێکخراوی تەندروستی جیهانی ئاماژەی بەوە کردووە کە خێزانە تازە ئاوارەبووەکان زیاتر لەگەڵ خێزانە میواندارەکان یان لە چادر و پەناگەی کاتیدا دەمێننەوە. ئەم دۆخە لەگەڵ نزیکبوونەوەی وەرزی ئێل نینۆ، بارودۆخێکی لەبار بۆ بڵاوبوونەوەی کۆلێرا، سورێژە، مەلاریا و تای خوێنبەربوون دروست دەکات.