ناوەندی هەواڵ

 

دایکانی شەمە بە داواکاری «با ونکراوەکان بدۆزرێنەوە، کوژەرەکان دادگایی بکرێن» لە هەفتەی هەزار و١٢٣دا ، چالاکیی هەفتانەی خۆیان لە مەیدانی گەلەتاسارای ئیستەمبوڵ بەڕێوەبرد. دایکانی شەمێ، ئەندام و بەڕێوەبەرانی لقی  ئیستەمبوڵی کۆمەڵەی مافی مرۆڤ ، دایکانی ئاشتی و ژمارەیەکی زۆر لە بەرگریکارانی مافی مرۆڤ بەشدارییان لە چالاکییەکەدا کرد. لە چالاکییەکەدا وێنەی ونکراوەکان هەڵگیران. لە چالاکیی ئەم هەفتەیەدا پرسیاریان لە چارەنووسی ئیبراهیم گوندەم کرد، کە لە ساڵی ١٩٩١دا دەستبەسەر کرا و ونکرا.

ئەندامی لقەی ئیستەمبوڵی کۆمەڵەی مافی مرۆڤ (İHD)، گولسەرەن یۆلەری، ڕاگەیەندراوەکەی خوێندەوە.

 

خێزانەکە هیچ زانیارییەکی وەرنەگرت

گولسەرەن یۆلەری دەربڕی کە ٣٥ ساڵە پرسیاری «ئیبراهیم گوندەم لە کوێیە؟» دەکەن و وتی: «ئێمە وەک کەسوکاری ونکراوەکان، لە مەیدانی گەلەتاسارایەوە تا کۆشویۆڵووی ئامەد، لەوێشەوە تا شەقامی گوڵستانی باتمان و تا شەقامی چەندی گەڤەر، هەمان پرسیار دەکەین. تاوانباران دیارن، ونکراوەکانمان لە کوێن؟ ئیبراهیم گوندەم ٣٩ ساڵ بوو و لە گوندی قەندەرخەلەی ناوچەی هەزرۆی ئامەد دەژیا. لە شەوی ٢٥ی ئەیلولی ساڵی ١٩٩١، گرووپێک لە سەربازان بە سەرپەرشتی کەنەن شاهین هێرشیان کردە سەر ماڵی گوندەم و ئیبراهیم گوندەمیان دەستبەسەر کرد. بە باوکی ئیبراهیم گوندەمیان وت: «بەیانی ئازادی دەکەین». دواتر خێزانەکە چوو بۆ قەراخۆڵ و ئەوان وتیان ئیبراهیم دەستبەسەر نەکراوە. خێزانەکە لە دژی ئەمە پەنای بردە بەر دادستانی کۆماری هەزرۆ. خێزانەکە چوو بۆ والیەتی ئامەد و فەرماندەیی سەربازی، بەڵام هیچ زانیارییەکیان لەسەر وەرنەگرت.»

 

دەبێت دەوڵەت چارەنووسی ئیبراهیم گوندەم ئاشکرا بکات

گولسەرەن یۆلەری بەردەوام بوو: «ئیبراهیم گوندەم، باوکی ٩ منداڵ، لەبەر چاوی خێزانەکەی دەستبەسەر کرا، بەڵام دەوڵەت ٣٥ ساڵە چارەنووسی ئەو ئاشکرا ناکات. بەهۆی فشاری سەربازانەوە، خێزانەکە لە ١٥ی شوباتی ١٩٩٣ کۆچیان کرد بۆ ناوەندی ئامەد. دایکی، مەریەم گوندەم، و باوکی، مەحمەت گوندەم، دەستیان لە گەڕان بەدوای کوڕەکەیان هەڵنەگرت. بەڵام هەردووکیان پێش ئەوەی لە چارەنووسی کوڕەکەیان ئاگادار ببن، ژیانیان لەدەست دا. دەبێت دەوڵەت چارەنووسی ئیبراهیم گوندەم ئاشکرا بکات.»

 

چالاکییەکە بە دانانی گوڵی قەرەنفول لە مەیدانی گەلەتاسارای کۆتایی پێهات.