ناوەندی  هەواڵ

 بەرەی لوبنان ـ ئیسرائیل پەرەسەندنێکی بێپێشینە بەخۆیەوە دەبینێت لەو کاتەوەی ئاگربردن دەستیپێکردووە؛ بۆردومانێکی چڕ کراوەتە سەر شاری سور و دەوروبەری، ئەمەش چەند کاتژمێرێک دوای دەرکردنی فەرمانی چۆڵکردنی بەرفراوان کە سەدان شارۆچکەی باشووری ڕووباری زەهرانی گرتەوە.**

سوپای ئیسرائیل بەیانی ئەمڕۆ پێنجشەممە ٢٨ی ئایار/مایۆ، دەستیکرد بە ئەنجامدانی هێرشی نوێ بۆ سەر دەوروبەری شاری سوری لوبنانی، ئەوەش دوای دەرکردنی فەرمان بە دانیشتوانی چەند باڵەخانەیەکی دیاریکراو بۆ ئەوەی دەستبەجێ چۆڵی بکەن.

وتەبێژی سەربازی بەناوی سوپای ئیسرائیلەوە ڕایگەیاند کە ئەم لێدانە چڕانە وەک وەڵامدانەوەیەک بووە بۆ ئەوەی کە بە "پێشێلکارییەکانی حیزبوڵا" بۆ سەر ڕێککەوتنی ئاگربردن وەسفی کردووە.

هاوکات سوپای ئیسرائیل زەنگی ئاگادارکردنەوەی لە کۆمەڵگەی نیشتەجێبوونی (شتولا) لێدا و هۆشداریدا لە "دزەکردنی فڕۆکەیەکی بێفڕۆکەوان"، ئەمەش لە کاتی زیادبوونی هێرشە ئاسمانییەکانی حیزبوڵا لە ناوەوەی باکووری ئیسرائیل.

لە کاتژمێرەکانی سەرەتای بەیانی دووەم ڕۆژی جەژنی قورباندا، ئاژانسی نیشتمانیی ڕاگەیاندنی لوبنان بڵاویکردەوە کە شەش مەدەنی کوژراون کە منداڵیشیان تێدایە، ئەمەش دوای ئەوەی فڕۆکەیەکی ئیسرائیلی ئۆتۆمبێلێکی بەئامانج گرت کە خێزانێکی ئاوارەی گواستووەتەوە لەسەر ئۆتۆبانی عەدلون لە ناوچەی نەبی ساری لە باشووری لوبنان.

بەپێی ئەوەی دەزگاکانی ڕاگەیاندن بڵاویانکردووەتەوە، هێزەکانی ئیسرائیل لە ماوەی ٢٤ کاتژمێری ڕابردوودا زیاتر لە ١٥٠ هێرشی ئاسمانییان ئەنجامداوە، کە نزیکەی ٥٠ شارۆچکە و گوندیان لە باشووری لوبنان و بیقاعی ڕۆژهەڵات و ڕۆژاوا بەئامانج گرتووە، لەوانەش سور، نەبتیە و مەشغەرە.

فەرمانەکانی چۆڵکردن کە ناوچەگەلێکی بەرفراوانی باشووری ڕووباری زەهرانی گرتەوە ــ کە نزیکەی ٣٠٠ شارۆچکە و گوندە و هاوتای ١٤٪ی خاکی لوبنانە ــ بووە هۆی شەپۆلێکی گەورەی کۆچکردن و ئاوارەبوون لە سور، نەبتیە و دەوروبەریان. لایەنە مرۆییەکان ڕایانگەیاندووە کە شاری سەیدا چیتر توانای وەرگرتنی خێزانی زیاتری نەماوە، و داوایان لە ئاوارەکان کردووە ڕوو لە دەشتی بیقاع و چیای لوبنان بکەن. ئەمەش گەورەترین پرۆسەی چۆڵکردنە لەو کاتەوەی کە ڕێککەوتنی ئاگربردن لە ١٧ی نیسان/ئەپریلدا چووەتە بواری جێبەجێکردنەوە.

ئەم گرژی و پەرەسەندنە پێش خولێکی چاوەڕوانکراوی دانوستانەکان دێت لە واشنتۆن لە نێوان دوو شاندی سەربازیی هەردوولا، کە بڕیارە لە سەرەتای مانگی حوزەیرانی داهاتوودا خولێکی نوێی دانوستانەکان بەدوای خۆیدا بهێنێت.