Navenda Nûçeyan- Platforma Yekîtiya Jinên Kurd li Başûrê Kurdistanê li dijî êrîşên komên çete yên Şamê û Enqerê yên li ser Rojavayê Kurdistanê daxuyaniyek belav kir.

‘Ev êrîş rasterast îrade û bedana jinê hedef digrin’

Di daxuyaniyê de hatiye diyarkirin ku wek Platforma Yekîtiya Jinên Kurd di vê dema dîrokî û çarenûsaz a şoreşa Rojava de, li her çar beşên Kurdistanê û hemû aliyên cîhanê deng, îrade û hêrsa xwe dixin yek û wiha hate gotin: “Dîmenên hovitiya ku di çend rojên dawî de ji aliyê çeteyên HTŞ’ê û bermahiyên DAIŞ’ê ve li dijî jinan hatin belavkirin, carek din rûyê wan ê kirêt û qirêj cîhanê dît. Ev êrîş rasterast îrade û fîzîka jinê hedef digrin, nîşana tolhildana ji şoreşa jinê ye. Divê herkes baş bizane ku jinên Kurd li Kobanê, Şengal û her bihusteke vê axê de DAIŞ’ê têk birin û şikandin. Îro jî wê li hember van çeteyên hov û tarî ne pêngavek paş ve bê avêtin ne jî serê xwe bitewînin.”

Banga Yekîtiya Netewî

Di dawiya daxuyaniyê de wiha hate gotin: “Ji bo me deriyê çareserî û kilîta serkeftinê tenê yekîtiya Kurda ye. Li ser vê bingehê em bang li hemû partî û hêzên Kurdistanî dikin ku di vê roja dîrokî de li derdora berxwedana gelê xwe ji yekgirtin û bihêzbûna netewî re bikin, pêşengtiyê bikin. Her wiha em bang li saziyên demokratîk û navneteweyî dikin ku li hember van hovitî û jenosîdan bêdeng nemînin û xwedî li nirxên mirovahiyê derkevin.”