Navenda Nûçeyan- Wezîra Karûbarên Civakî ya Hikûmeta Demborî ya Herêma Kurdistanê Kuwêstan Mihemed li Helebceyê têkildarî kar û xebatên wezareta xwe û rewşa li girtîgehên Herêma Kurdistanê civînek çapemeniyê lidar xist.

Kuwêstan Mihemed têkildarî rewşa girtîgehên çaksazî yên Herêmê agahî parve kir û got: “Me di nava girtîgehên çaksazî yên Herêmê de şoreşek reforman kiriye. Me rê li ber derbaskirina telefon, tiryak û çend diyardeyên din ên nebaş ên nava girtîgehan. bi temamî girtiye.”

‘Di girtîgehan de ji kapasîteya wê zêdetir girtî hene’

Di derbarê rewşa girtîgeha çaksaziya mezinan a Silêmaniyê de jî Kuwêstan Mihemed wiha got: “Girtîgeha Çaksaziya Mezinan a Silêmaniyê ji bo 990 kesan hatiye avakirin. Lê niha hezar û 716 kes tê de tên ragirtin. Li Hewlêrê 2 hezar û 232 kesên cezakirî hene. Li Duhokê hezar û 500 girtî hene. Li Silêmanî û Duhokê du qat zêdetir ji kapasîteya girtîgehan girtî hene, li Hewlêrê jî sê qat zêdetir e. Ev jî pêvajoya reforman a di girtîgehan de sist dike.”