HÊLÎN EHMED

Silêmanî – Şewbo Osmanî li Rojhilatê Kurdistanê ev 52 sal in ji bo parastina nasnameya Kurd dîzayna cilûbergên Kurdan dike. Şewbo Osmanî ji Sine ye, ji 11 saliya xwe ve bi dayîka xwe re cilûbergên Kurdan dîzayn dike. Îro jî 20 jin li ba wan bûne xwedî kar û hewl didin xebatên xwe bidomînin. Şewbo 63 salî ye û ji bo dîzaynkirina cilûbergên Kurdan ji Rojhilatê Kurdistanê hat Silêmaniyê.

Li Sine destpê kir li Silêmaniyê domand

Destpêkê beriya 30 salan her carê dihat Silêmaniyê, lê piştre biryar da ku karê xwe mezin bike û li vir bicîh bibe. Şewbo Osmanî 15 sal beriya niha li Silêmanî dikan vekir û bi qasî 6 mehan karê xwe li vir kir. Lê piştre vegeriya bajarê xwe Sine û xebata xwe li wir domand. Di heman demê de beşdarî mîhrîcanên li Başûrê Kurdistanê dibe û cilûbergên Kurdan dide nasandin. Şewbo Osmanî, diyar dike ku mîna jinek, bi dîzaynkirina cilûbergên Kurdan hewl dide çanda Kurd û nasnameya Kurd zindî bihêle. Lewma jî karê ku bi dayîka xwe re destpê kiriye niha bi keça xwe re didomîne.

‘Rêya parastina nasnameya Kurd lixwekirina cilûbergên Kurdan e’

Şewbo ya li Sine dijî û cilûbergên Kurdan dîzayn dike, bi van gotinan behsa destpêka karê xwe dike: “52 sal beriya niha hê 11 salî bûm min bi dayîka xwe re dest bi dirûtina cilûbergên Kurdan kir. Destpêkê min alîkariya wê dikir, lê piştre me biryar da ku debara xwe bi vî karî bikin. Ev 30 sal in li Sûka Sine ji bo jinan derfetên kar peyda dikim. Di zarokatiya xwe de min bi dayîka xwe re dest bi xebatê kir. Piştre me dît ku eleqeya ji bo cilûbergên Kurdan zêde bûye û me karê xwe mezin kir. Îro li atolyeya min ji 20’î zêdetir jin cilûbergên Kurdan dîzayn dikin. Armanca min a herî mezin, ez bi rêya cilûbergên Kurdan nasnameya Kurd li her derê zindî bikim. Lewma ez bi keça xwe re hewl didim vê pîşeyê bidomînim.”

Dîzaynek nûjen dike

Şewbo da zanîn ku ji bo cilûbergên Kurdan ne tenê ji aliyê pîrikan ve, her wiha ji aliyê jinên di her temenê de jî bên lixwekirin, dîzaynên nûjen dike û wiha got: "Ji bo ku jin di jiyana rojane de jî cilûbergên Kurdan lixwekin, em hinek guhertinên biçûk dikin. Bi vî awayî jinên ji her temenê dikarin dilsoziya xwe ya bi çanda Kurd re bidomînin."

Kêşeyên aborî jî nekarî wê bêzar bikin

Şewbo destnîşan kir ku ji ber pirsgirêkên aborî gelek kes neçar mane dev ji karê xwe berdin lê ew bi biryar e ku berdewam bike. Şewbo ev tişt gotin: "Berdewamiya di karê min de û têkoşîna li hember tengasiyên aborî, ji bo min girîng bû. Her çiqas li Rojhilatê Kurdistanê rewşa aboriyê xirab be jî, min ji bo debara jinan pêk bînim, atolyeya xwe negirt."

‘Piyase xirab bû vegeriyam Sine’

Şewbo diyar kir ku ji ber pirsgirêkên aborî neçar maye beşdarî mîhrîcanên li Başûrê Kurdistanê bibe û cilûbergên Kurdan bide nasîn. Şewbo da zanîn ku li Başûrê Kurdistanê hinek jin eleqeyek mezin nîşanî cilûbergên Kurdan didin lê hinek jî nadin û wiha pê de çû: "Li Sîlemaniyê min 6 mehan karê xwe meşand lê piştre piyase xirab bû û neçar mam vegerim Rojhilatê Kurdistanê. Gelek caran di nav Sûka Sine de bi cilûbergên Kurdan digerim. Ji ber ku li gor min cilûbergên Kurdan divê bi nasnameya Kurd re bijî."

‘Ji bo serxwebûna aborî jî girîng e’

Şewbo balkişand ser girîngiya lixwekirina cilûbergên Kurdan û wiha got: “Ji bo ku em nasname û hebûna xwe bidomînin, pêwîst e em lixwekirina cilûbergên Kurdan bidomînin. Jin bi dîzaynkirina cilûbergên Kurdan pêwîst e hem debara xwe bikin hem jî nasnameya Kurd zindî bikin. Dîzaynkirina cilûbergên Kurdî ne tenê hunerek kevneşopî ye, di heman demê de ji bo bidestxistina serxwebûna aborî ya jinan jî dibe alîkar.”