ژنێک لە مەخموور لەلایەن براکەیەوە کوژرا
شەوی ڕابردوو لە شارۆچکەی مەخموور ژنێکی گەنجی تەمەن ٢١ ساڵ لەلایەن براکەیەوە بە فیشەک کوژرا.
ناوەندی هەواڵ
عەقڵیەتی پیاوسالاری کە هەمیشە خواستی لەناوبردنی ژنە، کوشتنی ژنانی ڕەوا کردووە، ژنان بەدەستی پیاوان "باوک، برا. هاوژین، کەسوکاری" دەکوژرێن.
شەوی ڕابردوو ٤ی نیسان، لە شارۆچکەی مەخموور ژنێکی گەنجی تەمەن ٢١ ساڵ لەلایەن براکەیەوە بە فیشەک کوژرا، تەرمی ژنەکە ڕەوانەی پزیشکی دادی موسڵ کراوە، تا ئێستا لایەنە پەیوەندیدارەکان هیچ زانیارییەکیان لەبارەی هۆکاری ڕووداوەکە بڵاونەکردووەتەوە.
بەپێی زانیارییەکان بکوژەکە سەربازی سوپای عێراقە و لەدوای کوشتنی خوشکەکەی هەڵاتووە و تا ئێستا دەستگیر نەکراوە.
لە سێ مانگی یەکەمی ئەمساڵدا ٧ ژن لە باشووری کوردستان کوژراون و ٥ ژنیش بە شێوەی گوماناوی گیانیان لەدەستداوە، هەروەها لەم مانگەدا ژنێک بە شێوەی گوماناویی گیانی لەدەستدا و ژنێکی دیکەش ناچار بە خۆکوشتن کرا، کە هەردووکیان خەڵکی سەیدسادق بوون.