نەتەوە یەکگرتووەکان لەبارەی شەریفە محەمەدی هاتە دەنگ
نەتەوە یەکگرتووەکان بڵاویکردەوە، ڕێکخراوەکە لەبارەی کەیسی شەریفە محەمەدی نامەیەکی فەرمی بۆ نوێنەری ئێران ناردووە و تێیدا ئاماژەی بە چەندین پێشێلکاری کردووە، شەریفە تەنها بەهۆی کاری ئاشتیخوازانە ڕووبەڕووی سزای لەسێدارەدان بووەتەوە.
ناوەندی هەواڵ
هەڵمەتی بەرگری لە شەریفە محەمەدی لەبارەی بەدواداچوونی کەیسی شەریفە محەمەدی زیندانیی سیاسیی سزادراو بە سزای لەسێدارەدان لە لایەن ڕێکخراوی لێکۆڵینەوە و دۆزینەوەی ڕاستییەکانی سەر بە نەتەوە یەکگرتووەکان ڕاگەیەندراوێکی بڵاوکردەوەو تێیدا هاتووە: ڕێکخراوەکە نامەیەکی فەرمی بۆ نوێنەری ئێران لە نەتەوە یەکگرتووەکان ناردووە و تێیدا ئاماژەی بە چەندین پێشێلکاری گەورەی لە پرۆسەی دادگاییکردنی نادادپەروەرانە لە ئێران کردووە، هەروەها ئاماژە بە کەیسی شەریفە محەمەدی کردووە.
ئاماژە بەوەشکراوە، کەیسی شەریفە محەمەدی بووەتە سەرنجی دامەزراوە نێودەوڵەتییەکان و ئەو نادادپەروەرییانەی لە کاتی دەستبەسەرکردن و لێپرسینەوە و پرۆسەی دادگایی کردنیدا ئەنجامدراوە.
باس لەوەشکراوە، شەریفە محەمەدی تەنها بەهۆی کاری ئاشتیخوازانە و چالاکییە کۆمەڵایەتییەکانییەوە ڕووبەڕووی سزای لەسێدارەدان دەبێتەوە، پێویستە کۆمەڵگەی نێودەوڵەتی بە فشاری زیاتر ڕێگری لە جێبەجێکردنی ئەم بڕیارە نامرۆڤانەیە بکات و فشارەكان بەردەوام دەبێت لە چاودێریکردنی ئەو پرۆسەیە.
ئەوەش لەکاتیکدایە، لە ١٦ی ئابی ئەمساڵدا، لە لایەن لقی ٣٩ـی دادگای باڵای ئێران سزای لەسێدارەدانی شەریفە محەمەدی بە تەواوی پەسەند کرا، هەروەها بە پێی دوایین ڕاگەیاندراوەکەی هەڵمەتی”سێشەممەکانی نا بۆ لەسێدارەدان” لە سەرەتای ئەمساڵەوە تا ئێستا لە ڕۆژهەڵاتی کوردستان و ئێران ٦٢٧ کەس لەسێدارەدراون.