کۆنگرەی ستارو کۆمەڵەی نەورۆز بەشداری وۆرکشۆپێکیان کرد
لە لوبنان لە وۆرکشۆپێکدا کە نوێنەرانی کۆنگرەی ستار و کۆمەڵەی نەورۆزی کولتووری و کۆمەڵایەتیی نەورۆزیش تێیدا بەشداربوون، گفتوگۆیان لەبارەی توندوتیژی دژی ژنان و ئەزموونەکانی ژنان لە باکوور و ڕۆژهەڵاتی سووریا کرد.
ناوەندی هەواڵ
یەکێتی نیشتیمانی سەندیکای کرێکاران بە هاوکاریی کۆمەڵەی یەکسانی-وەردە بوتورسی ژنان، وۆرکشۆپێکی لەژێر ناوی "توندوتیژی و جیاکاری دژی ژنان و زەحمەتییەکانی گۆڕانکاری" ڕێکخست. وۆرکشۆپەکە لە ناوەندی فۆرومی هەفتانە لە شاری سەیدای لوبنان بەڕێوەچوو. شاندێکی کۆنگرەی ستار و کۆمەڵەی نەورۆزی کەلتووری و کۆمەڵایەتی، بەشدارییان لە وۆرکشۆپەکەدا کرد.
لەو دانیشتنەدا کە بۆ یاساکانی خێزان لەبەرچاوگیرابوو حەنان عوسمان، نوێنەری پەیوەندییەکانی کۆنگرەی ستار، ئەزموونی ژنانی ڕۆژئاوای لە چوارچێوەی ئیدارەی خۆبەڕێوەبەریی باکوور و ڕۆژهەڵاتی سووریادا باسکرد.
حەنان عوسمان ئاماژەی بەوە کرد کە ژنان لە باکوور و ڕۆژهەڵاتی سووریا مۆدێلێکی یاسایی و کارگێڕی پێشکەشدەکەن کە لەسەر بنەمای هاووڵاتیبوونە، نەک لەسەر بنەمای مەزهەبی. هەروەها تیشکی خستە سەر سیستەمی هاوسەرۆکایەتی، کە بەشداریی ژنانی لە بڕیارە سیاسی، کارگێڕی و کۆمەڵایەتییەکاندا بە شێوەیەکی ڕاستەقینە بەهێز کردووە.
وۆرکشۆپەکە بە گفتوگۆی کراوە کۆتایی هات، ئامادەبووان تیشکیان خستە سەر گرنگیی یەکخستنی یاساکانی خێزان، بەرەوپێشبردنی هاوکاریی ڕەگەزی لە پێکهاتەی بەڕێوەبردندا، ڕێگریکردن لە هەر کردەوەیەک کە ڕێگە خۆشدەکات بۆ جیاکاریی یاسایی و کۆمەڵایەتی دژی ژنان.