سلێمانی

 

ئێوارەی دوێنێ لە هۆڵی میلانۆ لە شاری سلێمانی، بەدەستپێشخەری نوێنەرایەتی خۆبەڕێوەبەری باکوور و ڕۆژهەڵاتی سوریا و بەرەی پشتیوانی ڕۆژئاوا و کەسایەتییە سیاسی و ئاکادیمیەکان، مەراسیمێک بە بۆنەی پێنجەمین ساڵیادی داگیرکردنی عەفرین بە خۆلەکێک وەستان بۆ گیانی پاکی شەهیدانی ئازادی دەستیپێکرد.

 

لە مەراسیمەکەدا سینەفزیۆنێک لەسەر داگیرکاری عەفرین و بەرخۆدانی گەل پێشکەشکرا، دواتر لەلایەن ئەڤین سوێد، نوێنەری بەڕێوەبەرایەتی خۆسەر لە باشووری کوردستان ئاماژەی بەوەکرد: گەل لە بەرامبەری هێرشی دەوڵەتی تورکیا بێدەنگ نەبوو و بەشداری خۆپاراستنی کرد، دوای داگیرکردنی عەفرین دەوڵەتی تورکیا و چەتەکانی چەندین کردەی نامۆڤانەیان بەڕێوەبرد، دەیان ژن کوژران و ڕفێندران و تا ئێستاش بێ سەروشوێنن.

 

سمکۆ ڕەشید، ئەندامی بەرەی پشتیوانی ڕۆژئاوا لە وتارێکدا ئاماژەی بەوەدا، "دوای پێنج ساڵ ئێستاش ڕۆژانە دەوڵەتی تورک و گروپە بەکرێگیراوەکانی دەستدرێژی بەردەوام دەکەنە سەر کورد و کوشت و بڕ ئەنجامدەدەن، هەموو ئەمانەش لەپێش چاوی جیهان و نەتەوە یەکگرتووەکان دەکرێت، ئەوانیش بەپێی بەرژەوەندییەکانی خۆیان دوور لە ئەخلاق و مافەکانی مرۆڤ، مامەڵە لەگەڵ دۆخەکەدا دەکەن.

 

زەهی ئەلڕەشید، ئەندامی بەڕێوەبەرایەتی خۆسەری لە باشووری کوردستان، بۆ نوژنها دوا و ئاماژەی بەوەدا، لەناو هەر هێرش و داگیرکارییەکدا زیانی گەورە بەر ژن و منداڵ دەکەوێت، لە هێرشەکانی تورکیاشدا بە هەمان شێوە بوو، بەڵام ژنان بەرخۆدانیان کرد، بەرخۆدانی عەفرین بە پێشەنگی یەپەژە و ژنان لە هەر چوارپارچەی کوردستان بەڕێوەچوو.

 

رووناهی سنە، خەڵکی ڕۆژهەڵاتی کوردستانە و دەڵێت: یەکێک لە هۆکاری هێرشکردن بۆ سەر عەفرین دەوڵەمەند بوونی جوگرافیایە، ئێمە وەکوو گەلی کورد تا هێزمان هەبێت تێکۆشانی ئازادیخوازان ون ناکەین و بەردەوامین لەسەر ڕێی ئەوان.