Navenda Nûçeyan – Talîban a ku ji nû ve bû desthilatî, zextên li ser cil û bergên jinan didomîne. Yekîtiya Çalakvanên Mafên Mirovan bi daxuyaniyek ragihand ku jinên li Heratê ji ber cil û bergên xwe û xuyangkirina xwe, li cihên giştî rastî girtin, gef û şermizarkirinê tên.

Di daxuyaniyê de hat diyarkirin ku kişandina jinan ji otomobîlan a li ber çavên mirovan, bi zorê veguhestina wan a ji bo cihên nenas û afirandina atmosferek tirsê, li bajêr “ne sepandina qanûnê ye yan jî mîsogerkirina aramiya giştî ye,” Di daxuyaniyê de hat gotin ku ev, mînakek binpêkirina rûmeta mirovan û mafên bingehîn ên jinan e.

Hewldanên ji bo dûrxistina jinan a ji qada giştî

Her wiha Yekîtiyê tekez kir ku girtina jinan a ji ber cilên wan, digel bêparkirina wan a ji perwerde, kar, beşdariya civakî û azadiya tevgerê, beşek ji pêvajoya jiholêrakirina jinan a ji qada giştî ye.

Yekîtiya Çalakvanên Mafên Mirovan kiryara Talîbanî ya li hember jinan, wek bîranîna serdemên cûrbecûr ên zordariya li ser jinan a di dîroka Efganistanê de bi nav kir. Yekîtiyê ev pêkanîn, wek berdewamiya “şêwazên dîrokî yên şermezarkirin, revandin û bêhêzkirina jinan” bi nav kir.

Banga ‘Tedbîr bigrin’

Saziyê bang li Neteweyên Yekbûyî, raportorên taybet, saziyên mafên mirovan, hikûmetên ku pabendî nirxên demokratîk in û civaka navneteweyî kir. Di bangewaziyê de hat xwestin ku li hember tiştê ku ew wek ‘çewsandina jinan’ bi nav dike, bêdeng nemînin û ji bo pêşîgirtina li berdewamiya vê meylê, tedbîran bigirin.

Cureyên lixwekirina cilan li ser jinan tên ferzkirin

Ev bersiv di demekê de tê ku di rojên dawî de raporên girtina jin û jinên ciwan li Heratê ji ber lixwenekirina hicabê ku ji hêla Talîbanî ve tê xwestin, hatine bel