RANIA ABDULLAH

Yemen – Di 10’ê Kanûnê de bi hevkariya Navenda Pêşxistin û Xebatên Jinan a Zanîngeha Taîzê û Rêxistina Mafên Mirovan a Mewon, bi sernavê ‘Pêşxistin û destekdayîna mafên jinan’ semîner hate dayîn. Ev semîner di çaçoveya bidawîbûna çalakiyên pêngava 16 rojan a têkoşîna li dijî tundiya li ser jinan de hat lidarxistin.

Di semînerê de akademîsyen, xwendekar û aktivîstên hiqûqê cih girtin, têkildarî girîngiya zagonên neteweyî li gorî zagonê navneteweyî were sererastkirin nîqaş hatin kirin.

Di semînerê de hiqûqnas Emel es- Sabrî têkildarî beyannameya Gerdûnî ya mafên mirovan û zagonên neteweyî yên Yemenê gotarek pêşkêş kir. Her wiha gotara duyem ji aliyê parêzer Ragde el-Maqtarî ve der barê bihêzkirina jinan û hebûna wan a di mekanîzmayên biryardayînê de hat pêşkêşkirin.

‘Mijar bi baldarî hatin hilbijartin’

Seroka Navenda Pêşketi û Xebatên Jinan Dr. Işraq Hael diyar kir ku ev semîner bi taybetî ji bo balkişandina ser parastina jinan û mafê jinan girînge û wiha got: “Mijara gotaran, bi awayê ku hem bihêzkirina siyasî û hem jî zagonên netewî bigrin dest hatin hilbijartin. Bivî awayê dê hişyarî zêde bibe û mafê jinan were destekkirin. Divê jin di qada siyasî de werin bihêzkirin, ev wê bi rastî ji bo parastina mafên jinan û garantîkirina wê de zemîn amade bike.”

‘Em ê pêşniyaran pêşkêşî rêveberiya zanîngehê bikin’

Hiqûqnas Emel es-Sabrî, da zanîn ku beşdarya vê semînerê firsendek e û wiha got: “Der barê beşdariya jinan a di pêvajoyên biryargirtinê de min gotarek pêşkêş kir û di dawiya semînerê de pêşniyarên girîng derketin holê. Em ê van pêşniyaran ji saziyên civaka sivîl û saziyên fermî re ragihînin her wiha di mijara bihêzkirina rêgezên mafên mirovan de em ê pêşniyaran pêşkêşî rêveberiya zanîngehê bikin.”

‘Ev çalakî di civakê de hişyariyê zêde dikin’

Parêzer û endama Yekîtiya Baroyên Yemenê Ragde el- Maqtarî, îfade kir ku di semînerê de bal kişandine ser riyên zêdekirina hebûna jinan di mekanîzmayên biryargirtinê de û mafên jinan û wiha got: “Ev mijar gelek girîng in, pêwistî bi hewldanên şênber ên ku van mijaran bixin meryetê û nîqaşên berfireh heye. Girîngiya van mijaran, ji peymanên navnetewî yê der barê mafên jinan, destûra bingehîn û zagonên Yemenê tên. Çalakiyên wih di civakê de hişyariyê zêde dikin. Em hewl didin binpêkirina mafên jinan were dîtin û bi riya van semîneran em hedef dikin ku hem li bajar û hem jî herêmên gundewar de hişyariya civakê ava bikin, daku mafê jinan bê dîtin û bikarin xwe bi parêzin.”

Parêzer Abir Maqlas, wek nûnertiya Rêxistina Mafê jinan a Mewon, da zanîn ku ev sazî li gel navenda xebatên jinan, bi taybet ji bo mexdurên girtinê û girêdayî vê binpêkirinên mafan di aliyê mirovî de hewldanek mezin didin.

Di dawiya semînerê de pêşniyarên wek, têgînên mafê mirovî bikeve mufredata dibistanê, kapasîteya mamosta û xwendekaran wer bihêzkirin, herî kêm ji sedî 30 kotaya jinan bê çalakkirin, reforma zagonên derbarê jinan de, pêşîlêgirtina zewaca zarokan, erêkirina sererastkirinên zagonên ku jinan ji tundiyê diparêzin derketin pêş.