Hesekê – Gelên Hesekê jî di bin dirûşmeya “Dem dema azadiya fîzîkî ya Rêber Apo ye” de, meşek li dar xistin û daxwaza azadiya fîzîkî ya Rêberê Gelê Kurd Abdullah Ocalan kirin.

Ji pêkhateyên Kurd, Ereb, Suryan û Ermen endam û rêveberên saziyên civaka sivîl beşdarî meşê bûn. Meşvanan alên Kongra Star, wêneyên Rêberê Gelê Kurd Abdullah Ocalan û pankartên bi nivîsa “Dem dema azadiya fîzîkî a Rêber Apo ye” hilgirtin.

Meş li ber çerxerêya Kevokê destpê kir û li ber çerxerêya Şehîd Serhed a taxa Miftî daxuyanî hat dayîn.

‘Dewleta Tirk li gor banga dîrokî tevnagere’

Piştî deqeyek rêzgirtin, Endama Koordînasyona Kongra Star a kantona Hesekê Nahid Silêman axivî. Nahid Silêman da zanîn ku pêvajoya ku Rojhilata Navîn tê de derbas dibe pêwîstiya wê bi pêkanîna banga Rêberê Gelê Kurd Abdulah Ocalan heye û wiha berdewam kir: “Îro em daketine qadan da ku em daxwaza azadiya fîzîkî ya Rêber Apo bikin, pergala îşkence û qirkirinê ya li dijî Rêber Apo tê meşandin şermezar bikin. Di 27’ê Sibatê de Rêbertî banga aştiyê kir. Lê dewleta Tirk a dagirker li gorî wê banga dîrokî tevnagere. Her tim êrîş û siyasetên xwe yên qirkirinê didomîne. Em wek jinên Bakur û Rojhilatê Sûriyeyê, asta têkoşîn û berxwedaniyê bilind bikin û xwedî li banga rêberê xwe derkevin û ji bo azadiya wî ya fîzîkî emê her kêlî li qadan bin. “

Daxuyanî bi dirûşmeya “ Bê Serok jiyan nabe “ bi dawî bû.