Navenda Nûçeyan – Ofîsa herêmî ya Asya-Pasîfîk a Şaxa Jinan a NY’ê, di rapora xwe ya nû de, diyar kir ku rayedarên Talîbanê di navbera 29’ê Îlon û 1’ê Cotmeha 2025’an de li Efganistanê 48 saetan înternetê girtine. Di raporê de hat destnîşankirin ku ev qutbûna ragihandinê, hestên tirs û tenêtiyê zêde kiriye û bûye sedema belavbûna agahiyên xelet û bandoreke cidî li ser jiyana jinan kiriye. Her wiha hat diyarkirin ku jinan ji piştgirî, dahat, perwerde û ragihandinê bêpar hiştiye.

Rapor, bi taybetî balê dikşîne ser astengiyên bernameyên alîkariya mirovî û dabînkirina pêdiviyên bingehîn ên mirovan. Hat diyarkirin ku qutubûna torên telefon û înternetê, yekane xeta alîkariyê ya neteweyî ya xizmetê dide kesên rastî tundiya zayendî tên asteng dike.

Ofîsa herêmî ya Şaxa Jinan a NY’ê, da zanîn ku divê kapasîteya amadekarî û bersiva lezgîn a saziyên li Efganistanê dixebitin werin bihêzkirin û hişyarî da ku astengiyên berfireh ên bi vî awayî dê bandorek giran li ser jiyana jinan û pêkanîna bernameyên piştgiriyê bikin.

NY’ê, destnîşan kir ku gihîştina dîjîtal a jinan ne luks e, pêdiviyek bingehîn û rêbazeke parastinê ye û di çarçoveya "Kampanyaya Cîhanî ya 16 Rojan a li Dijî Tundiya li Dijî Jinan" de bang kir ku jinên Efgan zêdetir piştgiriyê bibînin.